Notum fieri cupio omnibus tam presentibus quam futuris, quomodo ego Oodhelmus, filius quondam, tradidi pro remedio anime mee et pro eterna retributione tertiam partem hereditatis mee ad reliquias sancti saluatoris ceterorumque sanctorum que a Liudgero abbate in UUithmundi constitute sunt; traditamque in perpetuum esse uolo et numquam ulterius inmutari, in ea uero ratione tamen ut quamdiu uixero in presenti mortalitate, ad me pertineat pars illa iusto seruitio ad augendum non ad minuendum; post obitum uero meum de hac uita, cum omni integritate in ius transeat supradictarum reliquiarum et seruorum dei qui eas legitime custodire reperientur. Haec autem pars tertia hereditatis mee tribus in locis consistit: in pago Hisloi, in uilla que nuncupatur Ocanni, houa una quam proseruiunt liti mei, in pago uero Northtuianti, in uilla que dicitur Huleri, houa altera et in eodem pago houa tertia, in uilla que nuncupatur Manheri et sexta pars houe quarte in uilla que appellatur Hrenheri, que etiam sexta particula houe illius me uiuente in usus uergit iam dictarum reliquiarum cum illis conprehensionibus in silua que note sunt iuxta Hislam. Hec omnia trado atque transfundo ad memoratas reliquias et ad usus seruorum dei qui easdem reliquias sanctas procurare iuste uidentur, ut cum omnibus ad se pertinentibus illuc respiciant et deseruiant in sempiternum, sicut dictum est superius et decretum, cum omni integritate.
Acta est autem publice cum stipulatione subnixa in loco qui nuncupatur UUithmundi, anno XXVIIII regni domni relegiosi regis Carli, III kalendas iulias, coram testibus ac manum missoribus quorum nomina subtus notantur; et ut hoc testamentum firmius habeatur, notaui diem, tempus, locum quo scriptum est. Signum Oodhelmi qui hanc traditionem perfecit et subtus firmauit. Signum Hildigaeri. Signum Bernhardi. Signum Hildiberti. Signum Iudoni. Signum Butoni. Signum Meginleui. Signum Bernheri. Signum Meginberti. Signum Germundi.
Ego Hildigrimus indignus diaconus subscripsi.
Ego Abba presbiter subscripsi.