Notum fieri cupio omnibus tam presentibus quam futuris, quomodo ego Hirpingus, filius quondam Na, accepto pretio a Liudgero abbate uendidi ei uineam unam [in uilla] que nuncupatur Bacheim que etiam uilla in ripa consistit fluuioli que dicitur Melanbach, et eandem ipsi firmiter contradidi, traditamque in perpetuum esse uolo et nullis umquam temporibus inmutari, sed ad perpetuos usus suos et eclesie dei post obitum suum liberam et firmissimam a me et ab omnibus habeat potestatem, quicquid exinde facere uoluerit, stipulatione subnixa.
Acta est autem publice in Saxonia ubi tunc temporis fuimus in hoste, in loco qui nuncupatur Mimthum, anno XXX regni domni relegiosissimi regis Carli, XIIII kalendas augusti, coram testibus ac manum misoribus quorum nomina subtus notantur; et ut hoc testamentum firmius habeatur, notaui diem, tempus, locum quo scriptum est. Ego Thiatbaldws presbiter rogatus scripsi et subscripsi.
Signum Hirpingi qui hanc traditionem fecit et propria manu firmauit. Signum Hildibrandi.
Signum Berngeri. | Signum Hugbaldi.
Signum Gundholdi. Signum Berngeri. Signum UUanberti. Signum Hathubaldi