Dum unusquisque in presenti seculo conuersatur, cogitare debet et preuidere, quomodo animam suam saluare possit et eternum sibi refrigerium inuenire post temporalem et mortalem uitam mundi huius, hoc ego Hemricus perpendens in animo meo et frequenti meditatione reuoluens, tradidi pro remedio anime mee et pro eterna retributione ad reliquias sancti saluatoris et sanctae Marie semper uirginis et in manus Liudgeri presbiteri qui easdem reliquias procurauit, particulam hereditatis et proprii laboris mei, id est totam conprehensionem in silua que dicitur Heissi in aquilonali ripa fluuii Rure, quam ibi dudum conprehendi inter montem et ipsum fluuium communionemque in eandem siluam; simili modo tradidi et piscationem in Rura cum pascuis, peruiis, [aquis] aquarumque decursibus que illuc attinent uel in ipso loco excoli possunt et perfici. Hec omnia tradidi ad reliquias superius nominatas et in manus iam dicti presbiteri, traditamque in perpetuum esse uolo et per nulla temporum curricula ulterius inmutari, sed ad perpetuos usus eclesie dei in elemosinam meam ista omnia superius nominatus presbyter Liudgerus iure hereditario possideat, habeat, colat et fructificet et cuicumque disposuerit et utile esse prospexerit, post obitum suum commendare et tradere, liberam et firmissimam a me et ab omnibus habeat potestatem.
Si quis uero, instigatus a diabulo, quod tamen futurus esse non credo, ego ipse, quod absit, aut aliquis de heredibus uel proheredibus meis, seu quelibet extranea persona contra hanc traditionem uenire temtauerit aut eam infrangere proposuerit fixa et deliberata intentione, et insuper in dominicum auri libras duas, argenti pondus X coactus soluat, et sic quidem, quod repetit, euindicare non ualeat, sed firma et inmutabilis haec traditio in sempiternum permaneat cum stipulatione subnixa.
Acta est autem publice anno XXVIII regni domni nostri relegiosissimi regis Carli, VI kalendas martias, in uilla que dicitur Hlopanheldi, coram testibus ac manum misoribus quorum nomina subtus notantur; et ut hoc traditionis testamentum firmius perseueret in eternum, notaui tempus, diem, locum in quo factum est. Ego Thiatbaldus humilis presbiter rogatus scripsi et subscripsi.
Signum Heimrici qui hanc traditionem perfecit et propria manu firmauit. […]
Signum Hriatthrudae coniugis eius, consentientis et confirmantis. […]
Signum Heribaldi filii eius, consentientis et confirmantis. […]
Signum Eerici filii ipsius, eadem facientis. […]
Signum Berngeri subtus firmantis. Signum Aluberti clerici. Signum Hluduuuini. Signum Theganbaldi. Signum Guntfridi. Signum Oodfinni. Signum Hildiberti. Signum UUiniberti. Signum Casti diaconi. Signum Raadfridi. Signum Landberti.