König Arnolf bestätigt dem Kloster Sanct Gallen den Besitz der kleinen Abtei Faurndau und der Kapelle Brenz.
Datierung: 895 05 08
Ausstellungsort: Tribur
† In nomine sanctae et individuae trinitatis Arnolfus divina clementia rex. Si loca Deo dicata nostro amplificamus iuvamine et regio more munificentiae nostrae largitione ditamus, non solum ad temporalem vitam salubriter transigendam et aeternam feliciter optinendam, verum etiam eos, qui in eis Domino famulari noscuntur, pro nobis statuque regni nostri attentius divinam clementiam esse oraturos, id nobis profuturum liquido credimus. Ideoque universali Christianae religionis coetui, praesentis scilicet temporis et futuri, agnitum esse volumus, quia vir venerabilis Constantiensis ecclesiae episcopus, nomine Salomon, regalitatis nostrae eminentiam precatus est, ut quandam abbatiolam, quam quidem religiosus presbiter noster nomine Liutbrandus per praeceptum nostrum in proprium tenuerat, Furentauva nuncupatam, et potenti manu per consensum nostrum ad monasterium sancti Galli pro memoria divorum parentum nostrorum ac nostra animaeque suae remedio tradiderat, nostrae liberalitatis scripto ad idem monasterium aeternaliter persistendum roboraremus, statimque nos congruam eius petitionem libenti animo implere studentes decrevimus ita fieri. iussimus itaque hoc praesens auctoritatis nostrae praeceptum inde conscribi, per quod decernimus firmissimeque praecipimus, ut praescripta abbatiuncula cum omnibus appendiciis vel pertinentiis suis ab hodierna die et deinceps perpetuis temporibus ad iam dictum monasterium pro sempiterna antecessorum nostrorum nostraque et eiusdem presbiteri commemoratione pertineat atque consistat ad sustentationem solummodo fratrum ibidem Deo et sancto Gallo regulariter famulantium; ea videlicet ratione, ne ullus abbas vel eiusdem loci provisor quicquam inde ad suam peculiaritatem redigere vel usurpare neque praefatum locum, id est Furentauva, neque illum, qui dicitur Prenza, umquam alicui in beneficium prestare presumat, quatinus saepedicti monasterii fratres pro nobis et antecessoribus nostris Domini misericordiam frequentius atque devotius exorare delectet absque ullius adversatoris impedimento. Et ut haec nostrae confirmationis auctoritas per omnia volventis mundi curricula solidiorem in Christi nomine optineat stabilitatem, manu nostra subtus eam roborantes anulo nostro iussimus insigniri. Signum domni Arnolfi M piissimi regis. Engilpero notarius ad vicem Deotmari archicappellani recognovi et subscripsi. Data Villi iduum maiarum die, anno incarnationis Domini DCCCXCV, indictione XIII, anno vero VIII regni domni Arnolfi praestantissimi regis. Actum ad Triburias curtem regiam in Dei nomine feliciter. Amen.