Erlebald, abbé de Stavelot, ratifie lu fondation par Adélard de Roanne d’un ermitage sur le territoire du fief de My.
Datierung: 1159
In nomine sancte et individue Trinitatis. Frater Erlebaldus Stabulensis abbas, successoribus suis in perpetuum. Cum nostri officii et ordinis nostri sit omnibus consilii et auxilii solatium porrigere, dignum maxime est, ut fidelibus nostris et amicis in suis piis desideriis et justis postulationibus assensum nostrum inclinemus et eorum justas postulationes ad effectum perducamus. Eapropter, ad mentes presentium et omnium posteriorum nostrorum transmittimus quod, veniens ad presentiam nostram dilectus ac fidelis noster Adelardus de Rona suggessit nobis [quod] amore divine pietatis in termino ville Miez, quam a nobis in beneficium seu feodum tenebat, loculum ad serviendum Deo aptum repererat, in quo ex nostra concessione in honore sanctissime Dei genitricis [ecclesiam] et mansiunculas servorum Dei usibus aptas constituere intendebat, ad sustentationem eorundem edificiorum et omnium inibi habitantium, tres mansos terre de eadem villa Miez perpetuo ibi contradere disponebat. Et quia terminus parochialis de Schinaces pro tendebatur et decimationes ejusdem fundi et totius ville Miez ad eandem ecclesiam pertinebant, nequaquam sine assensu investiti de Schinaces libere et quiete fieri potuit. Evocantes itaque charissimum et fidelem nobis Poponem clericum nostrum, qui tunc temporis investituram ejusdem ecclesie tenebat, obtinuimus ut omnem decimationem illorum trium mansorum ad opus Deo in eodem loco servientium in manus nostras resignaret; et Adelardus similiter predictos tres mansos cum omnibus pertinentiis suis, obtenta a coheredibus et participibus eorundem mansorum, Gela videlicet Malmundariensi et a Henrico ejus filio et quodam Juliano eorum portionibus, in manus nostras reddidit et effestucavit; et nos per presentero paginam ipsam terram et ipsam decimationem, sicut prefati sumus, Werico venerabili sacerdoti qui, seculum omne fugiens, solitariam et Deo dignam vitam illic agere desiderat, et posteris suis concedimus et sigillo nostro confirmamus, ita videlicet ut singulis annis ipse et successores sui secundum regulam beati Benedicti in monacali habitu ordinali, Stabulaus in festo beati Remacli super altare ejusdem quatuor denarios, ad Vincula Petri Malmundarii super altare ejusdem quatuor denarios, et in martyrio apostolorum Petri et Pauli duos denarios persolvant Schinaces. Quibus persolutis, locus ille liber omnino permanebit, nullam precariam, nullum genus servitii persolvet cuilibet, sed que a fideli nostro Adelardo et ejus coheredibus et participibus prenominatis concessa et collata sunt et imposterum collatione fidelium conferri poterunt, libere et quiete possideant. Est autem situs loci in silva contra aquam que vocatur Welua et a terminis ville de Scorices usque ad fontem que vocatur Miez versus meridiem sub via que ducit ad sacros fontes qui in eadem sylva sunt, versus predictos tres mansos, cum pascuis et lignis ad editiciorum opus construendorum ubique accipiant libere. Et quia idem Adelardus locum illum pie et religiose exaltare et promovere intendebat, defensionem et protectionem ejusdem loci abbati simul et majori advocato Stabulensis ecclesie jure perpetuo contradidit. Acta sunt hec anno Domini millesimo centesimo quinquagesimo nono.