Texte roman de la charte précédente.
Datierung: 1159
En nom delle sainte et entiere Triniteit. Frere Erlebals, abbes de Stavelov, a tous ses successours a perpetueit. Com ilh soit digne chose et appartengue a nostre offisse et a nostre ordene de doneir consolation de consial et de aide maiement a nous feables et amis, et que nous en lours piis desiers inclinons a lours justes postulations et que nos les mettons debonairement a effect; et partant nos transmettons as penseies de chiaus qui sunt et qui a venir surit, que en nostre presenche vint nos ameis et feables Adelars de Rone et nos informat que, por amur de pieteit devine, ilh avoit troveit dedens les termes delle ville de Mies, lequel ilh tenoit de nos en fies, un liuchon qui mult astoit abile et covenable pour Dieu servir; en quel liuchon, en l’onour delle tressainte Virge mere de Dieu, ilh avoit en propos par nostre consain et ottroi de faire edefyer, mainsenner englies et mansion covenables aus usages des serians de Dieu, et qu’ilh voloit et avoit disposeii a mettre et doneir, pour lours edefiemens et pour chiaus qui la habiteroient a sortenir, trois meis de terre de couste le meisme ville de Mies. Et par tant que chis dis lius astoit dedens les termes delle parroche de Skinaches, et li diemage de cestui meisme fond et de icelle ville de Mies partenoient a l’englieze de Skinaches, che ne poioit estre fait franchement ne paisiblement sens l’assen del vestit de Skinaches. Pour ce, nous huchames et appellames Poppon nostre chier et feaul clerc, qui a celi temps tenoit le vesture de Skinaches, et fesimes tant enver li qu’ilh resignat en nos mains, pour chiaus qui en devandit liu Dieu serviroient, tout le diemage de ches trois meis. Et li dis Adelars ausi les trois meis devantdis avoic toutes lours appartenantes qu’ilh avoit acquis a chiaus qui astoient heurs et parceniers avecque li en dis trois meis, a savoir sunt Gele de Mamendiese, Henri son fil et un nomeit Julien lour parcenier, le reportat, werpit et eflestuat en nous mains. Et nous par ches presentes lettres donons ladicte terre et diemage, ensi corn devant est contenut, a venerable preste Werri qui fuioit le monde et desiroit a mineir vie solidaire et aggreable a Dieu, et l’avons confirmeit par nos sayeleirs a li et a ses successours par teil maniere que chascun an ilh et si successours qui apres li venront ordineit en abit monial selonc le regle sain Benoit, paieront sour l’alteit a Stavelov le jour delle fieste sain Remacle quatre doniers, et a le fieste sain Piere awost entrant sour l’alteit a Mamendiese ausi quatre doniers, et a Skinaches dois doniers le jour delle fieste sain Piere et sain Pol. Et parmi che, li lius devant dis demoure frans, si qu’ilh ne doit paner ne paierant priiere, talhe, creneie ne nulle autre maniere de serviche; ains volons que tout che que nos feables Adelars et ses parcheniers devantdis lour ont ottroiet et doneit et tout che que li prodons en temps a venir lour voront ottryer et donneir ilh possident franchement et quittement. Et est a savoir que chis lius siet en bois econtre l’iawe que on appelle Welleua, des termes delle ville de Scorices decy aile fontaine qui est appelee Mies vers le partie de midi, desos le voie qui meine as Saintes Fontaines qui sunt en ces meismes bois, en quel ilh prenderont delivrement et franchement les trois meis devantdis avoic le pastoraige, bois et mairins pour faire et edefiier l’oivre devantdite. Et par itant que cilh Adelars avoit en propos de piwement et religiosement promovoir et ensachier le dis liu, ilh le mist en la defencion et protection del abbeit et de grand avoweit del eglieze de Stavelov par droit parmanable. Che fut fait l’an de nostre Sangneur mil cent et chinquante noif.