Le roi Charles le Simple, à la prière des comtes Regnier et Bérenger, concède au moine Fulrade des biens situés à Cond et à Merl dans le pagus Maginisius et dans le comté de Bérenger, à la condition qu‘après sa mort, ces biens seront la propriété des religieux de Stavelot.
Datierung: 912 04 12
Ausstellungsort: Nimègue
In nomine sancte et individue Trinitatis, Karolus divina propitiante clementia rex et vir illustris. Si quando nostrorum fidelium precatibus aurem clementie nostre attribuimus, non solum regium morem decenter explemus, verum etiam eorumdem nobis animos ad conservanda debita fidelitatis jura congruenter aptamus. Quo circa noverit omnium sancte Dei ecclesie nostiorumque pariter fidelium presentium scilicet ac futurorum industria, qualiter Reginarius atque Berengarius venerandi comites nostram presentiam adeuntes petierunt a nostre majestatis culmine, ut cuidam sacerdoti ac cenobite Fulrado cognomine nonnullas dominii nostri res concederemus. Quorum libenter annuentes postulationi, deliberavimus omnimodo ita fieri. Dedimus siquidem illi in pago Maginisio in comitatu ejusdem Berengarii in villis Condodono simul et in Mairla nuncupatis curtes dominicas duas cum edifitiis desuper extructis ad easdem pertinentibus, sedibus quoque cum mancipiis supra residentibus vel capitale ibidem debitum persolventibus utriusque sexus, prato etiam silvaque communi, aquis insuper aquarumve decursibus, exitibus et regressibus et universis legitimis terminationibus ac quicquid in prescriptis locis nostre ditioni competere videbatur; ea scilicet sub conditione, ut dum advixerit his omnibus libere perfruatur aut quodcumque inde libuerit faciat, post suum vero ex hoc mundo transitum cuncta in nostrum emolumentum mense fratrum Stabulensium hereditaria successione relinquat. Unde et hoc nostre auctoritatis jussimus conscribi preceptum, per quod statuentes decernimus, ut prelibatus cenobita Fulradus res ceu diximus memoratas sibimet a nobis clementer indultas temporibus vite sue sine alicujus contradictione teneat, ac dominicandi usu firmissima ratione possideat, migransque a presenti seculo monachis supradicto degentibus in cenobio jure dimittat potiendos eterno. Et ut hec nostre dignitatis auctoritas majorem in Dei nomine obtineat firmitatis vigorem, manu propria eam subter firmavimus anulique nostri impressione insigniri precepimus.
Signum Karoli (L. M.) regis gloriosi.
Hugo regie dignitatis notarius adinvicem Heriuei archiepiscopi recognovi.
Data II idus aprilis, indictione XV, anno XX regnante domno Karolo rege, redintegrante XV, largiore vero hereditate indepta I. Actum Neumaga palatio, in Dei nomine feliciter. Amen.