Le roi Louis le Jeune, à la demande de l’abbé Hildebald, confirme aux monastères de Stavelot et de Malmedy toutes leurs possessions situées tant au delà de la Loire qu‘ailleurs qu’ils tenaient de la libéralité du roi Sigebert et d’autres bienfaiteurs, et notamment l’ancienne villa royale de Germinei dans le pagus de Châlons.
Datierung: 877 05 26
In nomine sancte et individue Trinitatis, Ludouuicus divina favente clementia rex. Si peticiones sacerdotum ecclesiarum Dei quibus dignitatem celsitudinis nostre digne laudabiliterque postulaverint, ad effectum perducimus, regiam consuetudinem exercemus et propter hoc Dominum Deum retributorem nos habere confidimus. Ideoque venerabilis vir Hildebaldus, abba de monasteriis Stabulaus et Malmundarii, que sunt in honore sancte Marie sanctorumque apostolorum Petri et Pauli vel ceterorum sanctorum a bone memorie domno scilicet Sigiberto rege ob amorem Christi de foreste nostra et fiscis super fluvium Amblauiam constructa, clementie nostre aures monstravit, qualiter ipse princeps et rex, pro mercedis sue impendio et eterna retributione, villas aliquas tam ultra Ligerim quam alias res proprias quas domnus Remaclus legitime possedit seu ceteras preceptiones sua manu roboratas, sub integra emunitate absque introitu advocatorum concessit. Unde et ipsas preceptiones seu et confirmationes precedentium regum memoratus abba se pre manibus habere affirmans, petiit celsitudinem nostram, ut tam id quod ipse princeps domnus Sigibertus de fisco suo seu reliquis locis que ad ipsa monasteria per suas auctoritates noscitur concessisse, quam etiam quod ad ipsa scripta monasteria a christianis hominibus noscitur collatum fuisse, et quod presentis temporis evo eorum subest possessioni et dominationi, ut hoc ipsum ipsis monasteriis dignaremur etiam nostra regali confirmare auctoritate. Cujus peticioni, non solum pro reverentia ipsius venerabilis viri, sed et pro devotione monachorum qui in eisdem locis Domino videntur famulari, accommodantes aures nostre serenitatis, juxta peticionem ejus, noverint omnes fideles nostri tam presentes quam et futuri, non solum quod nos postulavit confirmasse et roborasse, sed et villam dominicationis olim regie Germinei nomine sitam in pago Kalalaunense pro remedio anime nostre nos renovasse, cum mansis, terris, edifitiis, campis, pratis, pascuis, silvis, cultis et incultis, aquis aquarumve decursibus, viis et inviis, exitibus et regressibus; precipientes et firmiter statuentes, ut sicut constat a jam dicto principe domno Sygiberto rege vel a sibi succedentibus regibus usque in presens roboratum ipsis monasteriis et confirmatum, sic deinceps inposterum maneat inconvulsum. Et ut hec nostra concessio et auctoritas firmior inposterum habeatur, et melius a fidelibus nostris credatur, manu propria eam subter firmavimus et anuli nostri impressione insigniri jussimus.
Signum domni Ludouuici (L. M.) invictissimi regis.
Data VII kal. junii, anno dominice incarnationis DCCCLXXVII, indictione X, anno I° domni Hludouuici serenissimi regis in orientali Frantia Walkerus cancellarius vice Liuthberti archicancellarii recognovie.