In nomine sancte et individue trinitatis. Ruodulfus divina favente clemencia rex. Sanctas dei ecclesias a deo devotis fidelibus viris constructas eorumque elemosinarum largitionibus locupletatas, dum nemo recte credencium abneget, equum est nostrique precipue officii proprium, ut, si qua eis aut violenta manus presumtuose diripuit aut forte valencior indiscrete et non iure austulit, regia auctoritate restituantur. Quapropter noverit sancta mater ecclesia catholica com filiis suis vivis et victuris, qualiter ob anime nostre remedium humilesque petitiones Agaldrudis regine coniugis nostre dilectissime nec non et petitiones Burcardi archiepiscopi fratris nostri cari devotasque petitiones episcoporum Hugonis et Anselmi comitumque Ruodulfi et Bertulfi interventumque Henrici episcopi nobis per omnia fidelissimi reddimus sancte dei genitrici Marie ad episcopatum Lausannensem, cui ipse preesse videtur, medietatem Euonant ville, sicut antiquis determinationibus illo appendebat eo tempore, quo antecessores nostri causa ingruendum necessitatum inde austulerunt, sic illuc reddimus com ecclesia superstante et vineis et pratis silvis aquis aquarumque decursibus molendinis piscationibus omnibusque ad illam medietatem pertinentibus in omnibus usibus et utilitatibus, sicut Tuto quidam quamquam iniuste visus est possidere, quousque vite regnique nostri insidiator et preiudicatus impugnator, quidquid in regno nostro habere visus est, legibus amisit. Volumus ergo, ut deinceps ad episcopatum Lausannensem subiectum illo serviat et Henrico episcopo et illi quemcomque deus ei subrogaverit per successiones eternas, nemine contradicente et inquietante. Situm est in comitatu. Ut hec a nobis facta credantur et a posteris nostris non infringantur, manu nostra roboravimus et sigillari iussimus.
Signum domni Ruodulfi regis piissimi.
Paldulfus cancellarius recognovi.
Data XV kl. februarii, luna XXX, anno ab incarnatione domini MVIIII, regnante domno Ruodolfo rege anno XVII; actum Vrbe.