None
Datierung: 1101 06 21
Ad utilitatem tam presentium quam futurortim, placuit describere, ut in perpetuum possit teneri, qualiter Waulterius, Sancti Salvatoris rothonensis abbas, vir in cunctis strenuus, humiliter adiens Alanum comitem, requisivit ab eo quatinus iniustam quandam consuetudinem quam de abbatia exigere solebat ad aedificationem castri quod Blaen nuncupatur, pro qua illi ad opus comitis illud castrum servant, in abbacia multa mala iniuste faciebant, videlicet de Avezac et de Marzac et de Macerac, quod vulgo Bidaem noncupatur, pro salute suae animae suaeque coniugis ac filiorum Sancto Salvatori suisque monachis in perpetuum cumdonaret, et a tali improperio abbaciam illam absolveret. Sed, ut est casus humanarum rerum, licet ipse prefatus abbas admodum esset familiaris et amicus comitis, tamen ipsa vice quod petebat assequi non valuit; sed postea habuit ut voluit. Accidit deinde, per divinam providenciam, quod sepedictus comes cum uxore sua et liberis Rothonum venerant, et ibi non minimam curiam habebant, et de suis negociis cum ipsis tractabant. Ea tempestate, quidam nobilis miles Harscuidus nomine, de Sancto Petro namnetensi, cum comite venerat, qui ab ipso equos et quedam alia donaria non segniter exquirebat. Tunc temporis prefatus abbas habebat unum equum quam optimum, quem ab ipso habuerat. Tandem vir prudens, ab amicis quos in curia habebat sibi indicantibus, persensit quod comes ipsum equum sibi querere·volebat. Tunc, cum consensu et ammonicione Hermigardis comitisse, necnon et aliorum suorum amicorum, predictus abbas ante venit comitem, et ad ipsum cum aliquibus suorum fratrum veniens, ipsam suam peticionem, sicuti superius petiverat, humiliter petivit. Quod comes audiens super hoc cum suis consilium accepit, qui omnes unanimiter decreverunt id fieri debere quod tantus vir expetebat; omnes enim ipsum diligebant, et quicquid volebat libentissime annuebant. Tunc comes ipsum abbatem vocavit, et cum consensu et voluntate suae coniugis ac filiorum suorum, necnon baronum illic existentium, nomina quorum subterscribentur, quod petebat benignissime in perpetuum, pro remedio suae animae suaeque coniugis ac filiorum, concessit ac firmavit; et ut hoc donum firmius permaneret; prefatus abbas equum superius dictum, qui trecentis et eo amplius solidos valebat, comiti dedit, et comes Harscuido de Sancto Petro ilico tribuit. Factum est hoc in cimiterio Sancti Salvatoris, coram multis nobilibus, anno ab incarnatione Domini millesimo centesimo .VIII., feria .III., luna .V., indictione .IIII., Alano Brittanniam gubernante, Benedicto Namnetensium episcopo existente, Waulterio abbatiam Sancti Salvatoris strenue amministrante. Data .XI. kal. Iulii; teste huius rei: ipse comes A., qui donum dedit, et comitissa H. et duo filii eius, Conanus et Gaufridus, qui annuerunt et firmaverunt; testis B. episcopus, testis.