Pippin bestimmt, dass dem Kloster St. Denis alle Nachkommenschaft von Klosterhörigen zufallen solle. (unecht)
Datierung: 757 04 03
Ausstellungsort: Soissons
Pippinus dei gratia rex Francorum omnibus agentibus praesentibus et futuris. Cum illa bona voluntate sequimur et firmamus, quae patres nostri anteriores reges propter deum constituentes firmaverunt, credimus nobis ad salutem pertinere. Unde ad deprecationem domni Constramni venerabilis abbatis monasterii sancti et domni Dionysii martyris, ubi ipse in corpore quiescit cum suis sanctis sociis Rustico et Eleutherio, nos in dei nomine et propter deum ad postulationem praefati abbatis constituentes firmamus, ut in omni regno Francorum a deo nobis commisso de servis et ancillabus et mancipiis sanctorum dei praefatorum martyrum, ut, ubicumque sive masculus sive foemina de istorum iam dictorum sanctorum familia sese aliis alterius conditionis hominibus lege matrimonii sive connubii quoque modo sive legitimo sive furtivo complexu miscuerint, omnis omnino progenies eorum ad istorum praefatorum sanctorum martyrum potestatem sine ulla controversia alterius partis individua et sine ullo participe integra perducatur atque subdatur, sicut firmaverunt reges anteriores nostri. Si quis autem hanc regalem praeceptionem nostrorum praedecessorum atque nostram destruere voluerit atque temptaverit, decem libras auri purissimi et viginti pondera argenti thesauris regalibus solvere compellatur et cum omni domo sua, si antea liber erat, de caetero servus perpetualiter habeatur et lege mancipiorum ecclesiasticorum constringatur; si vero servilis conditionis fuisse dinoscitur, multetur coram iudicibus verberibus centum quinquaginta. Ut autem haec nostrae praeceptionis firmior habeatur constitutio, nostro subter assignari praecepimus anulo.
Signum (M.) Pippini gloriosissimi regis.
Ego Franco recognovi.
Actum Suessionis palatio die III non. aprilis indictione IIII, anno vero regni domni nostri Pippini VI; in dei nomine feliciter.