Pippin bestätigt dem Kloster St. Denis die demselben entrissene Villa Taberniacus im Pariser Gau.
Datierung: 754 01-07
Ausstellungsort: Verberie
Pippinus rex Francorum vir illuster. Credimus nobis ad eternum iudicem in mercede sociare, si hoc cognoscimus, quod ad loca sanctorum fuisse delegatum, et preceptionem anteriorum regum manu subscripta inibi confirmatione per nostrum oraculum pro amore dei et retributione sanctorum affirmamus. Ideoque venerabilis vir Fulradus abba de basilica peculiaris patroni nostri sancti Dyonisii, ubi ipse preciosus martyr cum sociis suis in corpore quiescere videtur vel ipse abba cum turma plurima monachorum degere videtur vel domino militare noscuntur, missa peticione nobis suggesserunt, eo quod ante hos annos illuster vir Guntaldus quondam villam suam nuncupatam Taberniacum sitam in pago Parisiaco pro anime sue remedio cum omni integritate sua ad ipsam basilicam domni Dyonisii delegasset vel firmasset, et postea Johannes ad peticionem illustris viri Ebroini maioris domus ipsam curtem per precariam tenuit. Similiter Frodoinus et Geruntus per precariam sancti Dyonisii tenuerunt et ad ipsam delegationem vel confirmationem seu ipsas precarias anterioris regis domni Childeberti et precariam avunculi nostri Grimoaldi maioris domus quondam nobis obtulerunt ad relegendum. Et quoniam per iniquam cupiditatem a malignis hominibus ipsa villa Taberniacus de ipsa casa sancti Dyonisii fuit abstracta vel inminuta, petiit ipse abba vel ipsa congregatio a celsitudine regni nostri, ut per nostram confirmationem vel deliberationem munire deberemus preceptum, quicquid gasindus noster Teudbertus per nostrum beneficium ipsam villam Taberniacum superius denominatam tenuit, hoc est una cum terris domibus edificiis presidiis manicipiis colonis inquilinis accolabus libertis, servis tam ibidem oriundis quam et aliunde translatis, rusticis et urbanis, saltibus atque subiunctis, terris cultis et incultis, vineis silvis pratis pascuis aquis aquarumve decursibus pecoribus peculiis mobile et inmobile omneque genus pecudum et universum meritum, cum appendiciis adiacentiis tam infra terminos quam extra terminos omnesque res adquisitas, quicquid dici aut nominari potest, seu et illas colonias in Acebrelido et Walion et illam warinnam fiscalem, per quam illa ruca consuetudo est trahere, quam ad ipsam villam Teudbertus tenuit, et quicquid a longo tempore ad ipsam villam ab antea fuit aspectum vel possessum, per nostram auctoritatem vel confirmationem et pro stabilitate regni nostri in dei nomine ad ipsa casa sancti Dyonisii sepe dicta villa Taberniacus cum omni integritate vel soliditate sua [sit] concessa vel confirmata. Et quicquid exinde ipse rector vel ipsa congregatio sancti Dyonisii facere voluerint, liberam et firmissimam in omnibus habeant potestatem faciendi et per huius nostre auctoritatis teneat vigorem nuncupatus Fulradus abba confirmatam in iure et dominatione sua cum dei et nostra gratia ad partem sancti Dyonisii. Et ut evis ac [futuris] temporibus maneat inconvulsum, manu nostra subter eam decrevimus affirmare et anulo nostro sigillare.
Signum (M.) illustris viri domni (et) Pippini gloriosissimi regis.
Widmarus iussus recognovit.
Data anno tertio regni nostri, Vermeria in palatio.