Datierung: 1156 02 09
Ausstellungsort: Benevent
Adrianus episcopus seruus seruorum Dei. Dilecto filio suo Willelmo abbati sancti Laudi de Constantino salutem et apostolicam benedictionem. Sacrosancta Romana ecclesia deuotos et humiles filios ex assuete pietatis officio propensius diligere consueuit et eos protectionis sue munimine tamquam pia mater est solita confouere. Quocirca, dilecte in domino fili Willelme, sinceritatem tue deuotionis, quam erga beatum Petrum et nos ipsos habere dinosceris, attendentes personam tuam cum bonis tam ecclesiasticis quam mundanis, que in presentiarum iuste et canonice possides uel in futurum Deo propitio rationabiliter poteris adipisci, sub beati Petri et nostra protectione suscipimus. Specialiter autem ecclesiam sancti Audoeni desuper Baldram et ecclesiam sancte Marie de Maisnillo Roscelini cum omnibus pertinentiis suis et cetera ecclesiastica beneficia iuste a prelatis ecclesiarum tibi concessa nos deuotioni tue auctoritate sedis apostolice confirmamus et presentis scripti patrocinio communimus. Statuentes, ut, si te in aliquo grauari presenseris, libere tibi liceat sedem apostolicam appellare. Nulli ergo hominum fas sit personam tuam uel bona temere perturbare seu hanc paginam nostre confirmationis infringere uel aliquatenus contraire. Si quis autem hoc attentare presumpserit, indignationem omnipotentis Dei et beatorum Petri et Pauli apostolorum eius se nouerit incursurum. Dat. Beneuenti V idus februarii.