Datierung: 1147 06 24
Ausstellungsort: Meaux
Eugenius episcopus seruus seruorum Dei. Dilectis filiis Yuoni abbati Rothonensis monasterii eiusque fratribus tam presentibus quam futuris regularem uitam professis in perpetuum. Desiderium, quod ad religionis propositum et animarum salutem pertinere monstratur, auctore Deo est sine dilatione complendum. Eapropter, dilecti in domino filii, uestris iustis postulationibus clementer annuimus et prefatum Rothonense monasterium, quod sancte Romane ecclesie iuris existit, predecessoris nostri felicis memorie Gregorii VII pape uestigiis inherentes sub beati Petri et nostra protectione suscipimus et presentis scripti priuilegio communimus. Statuentes, ut quascumque possessiones, quecumque bona idem monasterium in presentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis Deo propitio poterit adipisci, firma uobis uestrisque successoribus et illibata permaneant. In quibus hec propriis duximus exprimenda uocabulis: Bagnium uidelicet, ecclesiam sanctae Marie et ecclesiam sancti Petri de Rothono, Brunum, Wernoidel, Langon, Alerach, Ploicastel, Cons, Castellum Burgi, Montaltor, Iouiniacum, Prulliacum, Moiam, Marciacum, Maceracum, Auezacum, sanctum Sansonem de Penfau, Philgeriac, Rezac, Sancogo, Ardon, sanctum Gogalum, redditus de Bella Insula, Perirech, Enesmur, obedientiam sancti Tremori in Corisopito ciuitate, obedient(iam) de Cleuguen, obedient(iam) de Castelslorioch, obedient(iam) sanctae Crucis de Castello Goscelin, redditus de Rufiach, de Ruminiach, de Guerno, de Alga(n) et d(e) Kempeniach, obedient(iam) sancti Saluatoris de Plebelan, obedient(iam) sancti Saluatoris et aecclesiam beati Andraeae de Losoiacho cum pertinentiis suis, obedient(ias) in Penheriaco et in Guerraridia, obedient(iam) sanctorum Secundi atque Freardi, obedient(iam) in Her insula, obedient(iam) de Croachac, obedient(iam) de Saponiaco, obedient(iam) sancte Marie et beneficia in aecclesia beati Petri de Fruciaco, obedient(iam) sancti Stephani de Pornido, aecclesiam sancti Petri de Pruniaco, aecclesiam sancte Marie de Calma, ecclesiam sancte Marie de Cellario, beneficia in Nannetica ciuitate, beneficia in Broguerech et redditus de Siciaco et Carantoir, obedient(iam) de sancto Marco, obedient(iam) de Ballaco, obedient(iam) de Domo Larnogoni, obedient(iam) sancte Marie de Rocha, beneficia in Cambon, obedient(ias) de Trehelker et de Peniunz et de Stergaula. Obeunto uero te nunc eiusdem loci abbate uel tuorum quolibet successorum nullus ibi qualibet surreptionis astutia seu uiolentia preponatur, nisi quem fratres communi consensu uel fratrum pars consilii sanioris secundum Dei timorem et beati Benedicti regulam de eadem congregatione prouiderint eligendum; quod si talis, qui huic regimini congruat, inter uos inueniri non poterit, cum consilio Romani pontificis aliunde sibi patrem et magistrum expetant. Porro in ecclesiis, quas tenetis, statuimus, ut presbyteros eligatis et episcopis presentetis, quibus, si idonei fuerint, episcopi curam animarum committant, ut huiusmodi sacerdotes de plebis quidem cura eis respondeant, uobis autem pro rebus temporalibus debitam subiectionem exhibeant. Chrisma, oleum sanctum, consecrationes altarium siue basilicarum et ordinationes monachorum seu clericorum, qui ad sacros fuerint ordines promouendi, a diocesanis accipietis episcopis, si quidem gratiam atque communionem apostolice sedis habuerint et si ea gratis ac sine prauitate uoluerint exhibere, alioquin liceat uobis a quibus malueritis catholicis episcopis eadem sacramenta suscipere. Sepulturam quoque ipsius loci liberam esse concedimus, ut eorum, qui se illic sepeliri deliberauerint, deuotioni et extreme uoluntati, nisi forte excommunicati uel interdicti sint, nullus obsistat, saluo tamen iure matricis ecclesie. Hoc quoque presenti capitulo subiungimus, ut ipsum monasterium et abbates eius uel monachi ab omni secularis seruitii sint infestatione securi omnique grauamine mundane oppressionis remoti, in sancte religionis obseruatione seduli atque quieti nulli alii nisi Romane et apostolice sedi, cuius iuris est, aliqua teneantur occasione subiecti. Ad indicium autem, quod cenobium uestrum iuris sit beati Petri et sancte Romane ecclesie, singulis annis tres aureos nostro Lateranensi palatio persoluetis. Decernimus ergo, ut nulli omnino hominum liceat prefatum monasterium temere perturbare aut eius possessiones auferre uel ablatas retinere, minuere seu aliquibus uexationibus fatigare, sed omnia integra conseruentur eorum, pro quorum sustentatione et gubernatione concessa sunt, usibus omnimodis profutura, salua sedis apostolice auctoritate. Si qua igitur in futurum ecclesiastica secularisue persona hanc nostre constitutionis paginam sciens contra eam temere uenire temptauerit, secundo tertioue commonita, si non satisfactione congrua emendauerit, potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore ac sanguine Dei et domini redemptoris nostri Iesu Christi aliena fiat atque in extremo examine districte ultioni subiaceat. Cunctis autem eidem loco iusta seruantibus sit pax domini nostri Iesu Christi, quatenus et hic fructum bone actionis percipiant et apud districtum iudicem premia eterne pacis inueniant. Amen. Amen Amen.
R. Ego Eugenius catholice ecclesie episcopus ss.
Ego Theodewinus sancte Rufine episcopus ss.
Ego Albericus Hostiensis episcopus ss.
Ego Imarus Tusculanus episcopus ss.
Ego Guido presb. card. tit. sancti Grisogoni ss.
Ego Gillebertus indignus sacerdos tit. sancti Marci ss.
Ego Hugo presb. card. tit. in Lucina ss.
Ego Oddo diac. card. sancti Georgii ad uelum aureum ss.
Ego Gregorius diac. card. sancti Angeli ss.
Ego Iacintus diac. card. sancte Marie in Cosmydyn ss.
Dat. Meldis per manum Guidonis sancte Romane ecclesie diaconi cardinalis et cancellarii VIII kal. iulii, indictione X, incarnationis dominice anno MCXLVII, pontificatus uero domni Eugenii III pape anno IIIo.