Datierung: 1187 01 13
Ausstellungsort: Verona
Urbanus episcopus seruus seruorum Dei. Venerabili fratri R. Andegauen(si) episcopo et dilectis filiis M. Nanneten(si) electo et … Thoarcen(si) abbati salutem et apostolicam benedictionem. Dilecti filii nostri abbas et fratres sancti Florencii Salmurien(sis) transmissa nobis conquestione monstrarunt, quod, cum statutum sit et antiquitus obseruatum, ut decedente abbate sancti Melanii Redonen(sis) monachi eiusdem loci, si forte in suo collegio idoneus inuentus non fuerit, de claustro sancti Florencii abbatem sibi assumant, defuncto abbate, qui proximo iamdicto monasterio sancti Melanii prefuit, unum de suo collegio canonice elegerunt. Quod comes Britannie moleste sustinens et electionem ipsam pro suo uolens arbitrio usurpare tot predicto electo et capitulo molestias et iniurias irrogauit, quod predictus electus ipsi electioni cedere preelegit quam predictum monasterium occasione sua tot et tanta grauamina sustineret. Cumque monachi de eodem siue de sancti Florencii monasterio abbatem uellent eligere, comes nequaquam prima uexatione contentus contradicentibus fratribus contra consuetudinem antiquam et utriusque dignitatem ecclesie quendam alterius cenobii monachum in ecclesiam ipsam uiolenter intrusit, unde nonnulli ex monachis ipsius ecclesie, ne intrusioni iamdicte adquiescere uiderentur, ex ipso monasterio ad Salmurien(se) cenobium confugerunt. Volentes igitur iamdicto monasterio pastorali sollicitudine prouidere discretioni uestre per apostolica scripta mandamus atque precipimus, quatinus ad idem monasterium accedentes inquiratis super his omnibus ueritatem et, si uobis de predicta intrusione constiterit, intrusum ipsum ab eadem ecclesia omni gratia et timore postposito sine appellationis obstaculo remouentes iamdictum monasterium faciatis de alia persona idonea secundum antiquam et rationabilem consuetudinem hactenus obseruatam per electionem canonicam ordinari, ita quod, si fratres eiusdem loci conuenire nequiuerint, uos illum preficiatis auctoritate apostolica in abbatem, quem conuersatione pariter et doctrina magis uideritis approbatum et in quem uota conuenerint maioris et sanioris partis. Si quis uero temeraria presumptione restiterit, quominus mandatum apostolicum impleatur, uos ipsum a presumptione sua appellatione remota censura ecclesiastica compescatis nullis litteris obstantibus, si que apparuerint harum tenore tacito a sede apostolica impetrate. Quod si omnes his exequendis nequiueritis interesse, tu frater episcope, cum reliquo ea nichilominus exequaris. Dat. Veron. idus ian.