Datierung: 1186-1187 05 05
Ausstellungsort: Verona
VRBANVS episcopus seruus seruorum Dei. Dilectis filiis … abbati et canonicis de Rota salutem et apostolicam benedictionem. Cum simus ad curam et regimen uniuersalis ecclesie licet immeriti prouidentia superne dispositionis assumpti, si quando postulentur a nobis, que ad ecclesiarum tuitionem pertineant, petentium desideriis clementer nos conuenit condescendere et eorum uota effectu prosequente complere. Eapropter, dilecti in domino filii, uestris postulationibus grato concurrentes assensu domum et personas uestras cum omnibus, que impresentiarum rationabiliter possidet uel in futurum iustis modis Deo propitio poteritis adipisci, sub beati Petri et nostra protectione suscipimus et presentis scripti patrocinio communimus districtius inhibentes, ne quis a uobis contra antiquas et rationabiles consuetudines et institutiones canonicas exigere aliqua uel extorquere presumat. Nulli ergo omnino hominum etc. Si quis autem etc. Dat. Veron. III non. maii.