Datierung: 1184 10 10
Ausstellungsort: Verona
Lucius episcopus seruus seruorum Dei. Venerabilibus fratribus archiepiscopis et episcopis, in quorum parrochiis obedientie Fontis Ebraldi consistunt, salutem et apostolicam benedictionem. Oportet nos pastorali sollicitudine, quam licet indigni gerimus, prouidere, ut pia uota solita Dei benignitate concepta, quantum in nobis est, nullum sui defectum expectationo temporis patiantur, sed, in quantum permittit ratio, ad sortiendum optate benedictionis effectum ex subuentione nostra celerius adiuuentur. Inde est, quod iuxta formam tenoremque mandati, quod a pie r[e]cordationis Alex(andro) papa predecessore nostro manauit, uniuersitati uestre per apostolica scripta mandamus, quatinus uirginibus castitatem Deo uouentibus, que ad sacrum ordinem Fontis Ebr(aldi) transierint, benedictionis munus in omnibus sollempnitatibus beate uirginis et in diebus dominicis necnon et omnium apostolorum festiuitatibus, si hoc poposcerint, non negetis, sed potius seposita nimia conuenientis temporis obseruantia satagatis eas ex officii uestri debito more solito domino consecrare. Dat. Veron. IIII idus nouemb.