Datierung: 1182 06 04
Ausstellungsort: Velletri
Lucius episcopus seruus seruorum Dei. Dilectis filiis Stephano Andegaue(nsi) et Unfredo Toarcen(si) archidiaconis salutem et apostolicam benedictionem. Cum inter dilectum filium nostrum abbatem de Niolio et dilectam in Christo filiam abbatissam sancte Marie Andeg(auensis) coram uenerabili fratre nostro Nannetensi episcopo questio uerteretur et super quadam terra, eam abbas de donatione R(adulfi) domini de Macheto dicebat se annis pluribus possedisse et per filium militis uiolenter fratribus suis reclamantibus spoliatum. Verum abbatissa e contrario proponebat, quod adepta possessione per B(ernardum) de Macheto post plures annos, quibus in pace tenuerat, sine iudicio uiolenter eiecta fuerat per abbatem et, salua questione proprietatis, iudicio memorati episcopi restituta est et post plures inducias partibus assignatas abbas ad uenerabilem fratrem nostrum H(enricum) Albanensem episcopum, apostolice sedis legatum, abbatissa uero ad nostram audientiam appellauit et uterque nuncium licet insufficientem ad presentiam nostram transmisit. Unde cum apud nos causa finiri non posset, eam ipsis nuntiis consentientibus uestre commisimus experientie terminandam. Quocirca discretioni uestre per apostolica scripta precipiendo mandamus, quatinus partes ante presentiam uestram conuocetis et rationibus hinc inde plenius auditis et cognitis causam ipsam appellatione remota concordia uel iudicio decidatis non obstantibus litteris hinc inde sine communi assensu partium impetratis. Dat. Uelletri II non. iunii.