Logo: Universität Hamburg
Logo: Formulae, Litterae, Chartae
Logo: Akademie der Wissenschaften in Hamburg

Papsturkunden in Frankreich. Band 5: Touraine, Anjou, Maine und Bretagne., Nr. 132


Datierung: 1164-1165 03 11
Ausstellungsort: Sens

Alexander episcopus seruus seruorum Dei. Venerabilibus fratribus archiepiscopis et episcopis, in quorum parrochiis obedientie Fontis Ebraldi consistunt, salutem et apostolicam benedictionem. Oportet nos pastorali sollicitudine, quam licet indigni gerimus, prouidere, ut pia uota solita Dei benignitate concepta, quantum in nobis est, nullum sui defectum expectatione temporis patiantur, sed, in quantum permittit ratio, ad sortiendum optate benedictionis effectum ex subuentione nostra celerius adiuuentur. Inde est, quod vniuersitati uestre per apostolica scripta mandamus, quatinus uirginibus castitatem Deo uouentibus, que ad sacrum ordinem monasterii Fontis Ebraldi transierint, benedictionis munus in omnibus sollempnitatibus beate uirginis et in diebus dominicis necnon et omnium apostolorum festiuitatibus, si hoc poposcerint, non negetis, sed potius seposita nimia conuenientis temporis obseruantia satagatis eas ex officii uestri debito more solito domino consecrare. Dat. Senon. V id. mart.