Datierung: 1157 04 26
Ausstellungsort: Rom, St. Peter
Adrianus episcopus seruus seruorum Dei. Dilectis filiis Alberto priori caeterisque canonicis ecclesiae sancti Maclouii de Insula tam presentibus quam futuris regularem uitam professis in perpetuum. Effectum iusta postulantibus indulgere uigor aequitatis et ordo exigit rationis praesertim quando petentium uoluntatem et pietas adiuuat et ueritas non relinquit. Eapropter, dilecti in domino filii, uenerabilis fratris nostri Iohannis episcopi uestri praecibus inclinati uestris iustis postulationibus clementer annuimus et praefatam ecclesiam, in qua diuino mancipati estis obsequio, ad exemplar praedecessoris nostri sanctae memoriae Eugenii pape sub beati Petri et nostra protectione suscipimus et praesentis scripti priuilegio communimus. In primis siquidem statuentes, ut ordo canonicus, qui a praedicto fratre nostro Iohanne episcopo secundum beati Augustini regulam et obseruantiam religiosorum fratrum sancti Uictoris in eadem ecclesia nouiter institutus est, perpetuis ibi temporibus inuiolabiliter obseruetur. Episcopus uero, qui pro tempore ibidem fuerit ordinandus, a fratribus ipsius ecclesiae de sua siue de alia regulari congregatione suae professionis canonice eligatur. Nec quisquam in eodem Maclouiensi episcopatu qualibet subreptionis astutia uel uiolentia archidiaconus nisi regularis canonicus statuatur. Praeterea quascumque possessiones, quaecumque bona de dono uel ex concessione eiusdem fratris nostri episcopi uel aliorum Dei fidelium in presentiarum iuste et canonice possidetis aut in futurum concessione pontificum, largitione regum uel principum, oblatione fidelium seu aliis iustis modis Deo propitio poteritis adipisci, firma uobis uestrisque successoribus et illibata permaneant. In quibus haec propriis duximus exprimenda uocabulis: ecclesiam de Ploumaugat, ecclesiam de Medreac, ecclesiam sancti Maclouii de Bentium, ecclesiam sancti Petri de Marcapolet, ecclesiam sancti Petri de Ploresto, ecclesiam sancti Petri de ciuitate Aleth, ecclesiam de Caro, ecclesiam de Algan, ecclesiam de Maura, ecclesiam de Guipre, ecclesiam de Breat, ecclesiam de Prepriaco, ecclesiam sancti Armagilli de Ploremel cum capellis et pertinentiis earum, decimam quoque omnium reddituum Maclouiensi episcopo pertinentium. Ad haec adicientes statuimus, ut canonici professi eiusdem ecclesiae et qui stabilitatem in ipsa ecclesia promiserunt, donec canonicus ordo secundum beati Augustini regulam ibi fuerit conseruatus, ad alium locum sine licentia episcopi sui uel capituli demigrandi nullam habeant facultatem. Omnium autem possessionum, quas habebat eadem ecclesia, cum ordo canonicus ibidem institutus est, tertia pars cedat episcopo, qui pro tempore ibi fuerit, duas uero integre et quiete canonici habeant iuxta prouisionem sui prioris easdem in suis necessitatibus disponendas. Decernimus ergo, ut nulli omnino hominum liceat praefatam ecclesiam temere perturbare aut eius possessiones auferre uel ablatas retinere, minuere aut aliquibus uexationibus fatigare, sed omnia integra conseruentur eorum, pro quorum gubernatione et sustentatione, concessa sunt, usibus omnimodis profutura, salua sedis apostolicae auctoritate et episcopi uestri debita obedientia et reuerentia. Si qua igitur in futurum ecclesiastica saecularisue persona hanc nostrae constitutionis paginam sciens contra eam temere uenire temptauerit, secundo tertioue commonita, si non satisfactione congrua emendauerit, postatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore et sanguine Dei et domini redemptoris nostri Iesu Christi aliena fiat atque in extremo examine districtae ultioni subiaceat. Cunctis autem eidem loco iusta seruantibus sit pax domini nostri Iesu Christi, quatenus et hio fructum bonae actionis percipiant et apud districtum iudicem praemia aeternae pacis inueniant. Amen. Amen. Amen.
R. Ego Adrianus catholicae ecclesiae episcopus. BV.
Ego Gregorius Sabinensis episcopus.
Ego Manfredus presb. card. tit. sanctae Sauinae.
Ego Iulius presb. card. tit. sancti Marcelli.
Ego Octauianus presb. card. tit. sanctae Ceciliae.
Ego Astaldus presb. card. tit. sanctae Priscae.
Ego Hubaldus presb. card. tit. sanctae Crucis in Ierusalem.
Ego Gerardus presb. card. tit. sancti Stephani in Celio monte.
Ego Iohannes presb. card. tit. sanctorum Siluestri et Martini.
Ego Iohannes presb. card. sanctorum Iohannis et Pauli tit. Pamachii.
Ego Ildebrandus presb. card. basilicae XII apostolorum.
Ego Odo diac. card. sancti Georgii ad uelum aureum.
Ego Rodulphus diac. card. sanctae Luciae in Septasolis.
Ego Guido diac. card. sanctae Mariae in porticu.
Ego Iacintus diac. card. sanctae Mariae in Cosmydin.
Ego Odo diac. card. sancti Nicolai in carcere Tulliano.
Ego Bonadies diac. card. sancti Angeli.
Ego Ardicio diac. card. sancti Theodori.
Ego Albertus diac. card. sancti Adriani.
Ego Boso diac. card. sanctorum Cosmae et Damiani.
Dat. Romae apud sanctum Petrum per manum Rolandi sanctae Romanae ecclesiae presbiteri cardinalis et cancellarii VI kal. maii, indictione V, incarnationis dominice anno M. C. L. VIIo, pontificatus uero domni Adriani papae IIII anno tertio.