Datierung: 1147 11 01
Ausstellungsort: Châlons-sur-Marne
Eugenius episcopus seruus seruorum Dei. Dilectis filiis Guntarno abbati de Melereio eiusque fratribus tam praesentibus quam futuris regularem uitam professis in perpetuum. Officii nostri nos hortatur auctoritas pro religiosorum uirorum statu satagere et eorum quieti sollicite prouidere. Ideoque, dilecti in domino filii, uestris iustis postulationibus libenter annuimus et monasterium de Melereio, in quo diuino uacatis obsequio, sub beati Petri et nostra protectione suscipimus et presentis scripti priuilegio communimus. Statuentes, ut quascumque possessiones, quaecumque bona idem monasterium in presentiarum iuste et canonice possidet aut in futurum concessione pontificum, largitione regum uel principum, oblatione fidelium seu aliis iustis modis Deo propitio poterit adipisci, firma uobis uestrisque successoribus et illibata permaneant. Decernimus autem, ut nulli fratrum uestrorum liceat post factam professionem absque abbatis et fratrum licentia de claustro discedere; discedentem quoque nullus audeat retinere. Sane laborum uestrorum, quos propriis manibus aut sumptibus colitis, seu de nutrimentis animalium uestrorum nullus a uobis decimas exigere praesumat. Nulli ergo omnino hominum liceat praefatum monasterium temere perturbare aut eius possessiones auferre uel ablatas retinere, minuere seu quibuslibet molestiis fatigare, sed omnia integra conseruentur eorum, pro quorum sustentatione et gubernatione concessa sunt, usibus omnimodis profutura, salua sedis apostolicae auctoritate diocesani episcopi canonica iustitia. Si qua igitur in futurum ecclesiastica saecularisue persona hanc nostrae constitutionis paginam scieins contra eam temere uenire temptauerit, secundo tertioue commonita si non satisfactione congrua emendauerit, potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore ac sanguine domini nostri Iesu Christi aliena fiat atque in extremo examine districtae ultioni subiaceat. Cunctis autem eidem loco iusta seruantibus sit pax domini nostri Iesu Christi, quatinus et hic fructum bonae actionis percipiant et apud districtum iudicem praemia eternae pacis inueniant. Amen. Amen. Amen.
Ego Eugenius catholicae ecclesiae episcopus ss.
Dat. Catalauni per manum Guidonis sanctae Romanae ecclesiae diaconi cardinalis et cancellarii kal. nouembris, indictione XI, incarnationis dominicae anno Mo. Co. XLo. VIIo, pontificatus uero domni Eugenii III pape anno III.