Datierung: 1146 08 16
Ausstellungsort: Viterbo
EUGenius episcopus seruus seruorum Dei. Dilectis filiis G. abbati et monachis Maioris Monasterii salutem et apostolicam benedictionem. Uenerabiles fratres nostri G. Burdegalensis archiepiscopus, G. Carnotensis et L. Engolismens(is) episcopi litteris suis nobis significarunt, quod pro controuersia, que inter uos et venerabilem fratrem nostrum I. Aletensem episcopum super aecclesia sancti Maclouii agebatur, iuxta mandatum nostrum utramque partem Petragoras ante suam presentiam euocarunt. Ad diem itaque et locum uobis prefix[u]m tam uos quam episcopus conuenistis, sed episcopo postulante tu, G. abbas, nec una etiam die expectasti nec per te uel per nuntios tuos canonicam excusationem pretendisti nec pro te responsales dimisisti, sed te contumaciter absentasti. Ipsi uero mandatum nostrum transgredi metuentes cognito per religiosos uiros, quia publica fama esset in terra illa, quod eadem ecclesia sedes episcopalis extitisset, de multis testibus, quos secum adduxerat episcopus et tibi, G. abbas, uel fratribus tuis presentauerat, religiosorum et discretorum uirorum consilio tres presbiteros diligenter examinatos susceperunt, qui tactis sacrosanctis euangeliis iurauerunt se audisse et uidisse aecclesiam sancti Maclouii, de qua erat controuersia, sedem episcopalem fuisse. Susceptis igitur testibus et iuramentis ipsa ecclesia sancti Maclouii et possessionibus, quas tunc possidebat, cum vobis tradita fuit, eundem episcopum iuxta mandatum nostrum inuestierunt. Qvia igitur nostri officii est fratrum nostrorum bene gesta firmare, eandem inuestituram et quicquid ab ipsis super hoc factum est, sedis apostolicae auctoritate nobis a Deo concessa confirmauimus et vobis super hoc de cetero perpetuum s[i]lentium imponimus. Per apostolica itaque vobis scripta mandamus et mandando precipimus, quatinus eandem beati Maclouii aecclesiam cum omnibus possessionibus, quas tunc possidebat, cum vobis tradita fuit, omni occasione et dilatione remota eidem episcopo in pace dimittatis et, si quid exinde post datum iudicium abstulistis, cum integritate reddatis. Hoc autem uos sollicite uolumus precauere, ut eundem episcopum, qui cum maxima paupertate in causa hac diutius laborauit, super hoc de cetero nullatenus inquietare presumatis nec nos ulterius vobis scribere super hac causa cogatis. Dat. Viterbi XVII kal. septembris.