Datierung: 1144 09 24
Ausstellungsort: Lateran
Lucius episcopus seruus seruorum Dei. Uenerabilibus fratribus Turon(ensi) archiepiscopo, Andeg(auensi), Cenomannensi et Nannet(ensi) episcopis salutem et apostolicam benedictionem. Uenerabilia loca cum ipsis personis diuino famulatui mancipatis nullis debent grauaminibus concuti, nullis molestiis agitari. Unde nos oportet pro ipsis attentam sollicitudinem gerere et, ne prauorum hominum agitentur molestiis, sedis apostolice munimen confouere. Est locus, sicut accepimus, in Andegauensi episcopatu, qui Caritas dicitur, in quo religiose mulieres conuenerunt et se ipsas diuino famulatui manciparunt. Que a prauis illius terre hominibus, prout nobis significatum est, graues iniurias et oppressiones sustinent et in bonis earum multas et indebitas exactiones faciunt. Eapropter ipsarum quieti et tranquillitati pro nostri officii debito prouidere uolentes locum ispum cum omnibus, que in presentiarum iuste et canonice possidet aut in futurum rationabilibus modis Deo propitio poterit adipisci, sub beati Petri et nostra protectione suscipimus et presentis scripti patrocinio communimus. Uobis itaque per apostolica scripta mandamus, ut, si quis ex subditis uestris easdem sorores temere perturbare uel quamlibet eis iniuriam seu molestiam irrogare presumpserit, postquam earum querimoniam susceperitis, occasione et dilatione remota canonicam de ipso iusticiam faciatis easdemque sorores pro beati Petri et nostra reuerentia iuuare et manutenere curetis et in suis oportunitatibus opem eis et consilium tribuatis. Dat. Lat. VIII kal. octob.