Datierung: 1119 09 24
Ausstellungsort: Tours
Calixtus episcopus seruus seruorum Dei. Venerabilibus fratribus archiepiscopis et episcopis Galliarum salutem et apostolicam benedictionem. In Aruernensi concilio, cui dominus et predecessor noster sanctae memoriae Urbanus papa cum episcoporum multitudine praesidebat, quaestionem motam comperimus de episcopis, qui altaria monasteriis frequenter pecunia redimi compellebant. Super que idem dominus uenalitatem omnem tam ex rebus quam ex mysteriis ecclesiasticis remouere desiderans sententiam protulit in posterum id fieri prohibens et praebendas omnes uenundandas pariter interdicens. Altaria uero uel decimas a monasteriis ab annis triginta et supra sub huiusmodi redemtione possessas quiete deinceps et sine molestia qualibet eis possidendas apostolicae sedis auctoritate firmauit, saluo utique episcoporum censu annuo, quem ex eisdem altaribus habere consueuerant. Rogamus itaque caritatem uestram, monemus atque praecipimus, ne abbati et monachis Maioris Monasterii beati Martini, quod specialiter ad Romanam cognoscitur ecclesiam pertinere, contra predicti domini nostri mandatum de uicariorum seu personarum releuatione molestias inferatis. Nos enim, quod inde in supradicto concilio statutum est, litterarum praesentium auctoritate firmamus et ratum atque inuiolabile futuris temporibus permanere censemus. Dat. Turonis VIII kal. octobris.