Datierung: 1073 vor 04 21
Alexander episcopus seruus seruorum Dei. Dilecto fratri in Christo Radulfo Turonensi archiepiscopo salutem et apostolicam benedictionem.Apostolicae sedis beniuolentia et antiqua commoniti consuetudine fraternitati tuae usum pallei ex more ad missarum sollempnia in subscriptis festiuitatibus ad Christi et nostram in ipso gloriam concedimus, uidelicet in natiuitate domini, epiphania, in festiuitatibus sanctae Mariae, in cena domini, in sabbato sancto, in die resurrectionis domini ac prima, secunda et tercia feria, in ascensione domini, in pentecosten, in natali sancti Iohannis baptistae et sollempnitatibus apostolorum, Stephani protomartiris, sancti Laurentii, sancti Michael(is) archangeli et in festiuitate omnium sanctorum, sancti Martini episcopi et confessoris, sancti Mauricii et in dedicatione seu caeteris principalibus festis tuae principalis aecclesiciae necnon in celebrandis ordinationibus episcoporum seu aliorum sacrorum ordinum et in anniuersario die ordinationis tuae. Cuius quoniam indumenti honor modesta actuum celebritate obseruandus est, hortamur caritatem tuam, ut mores conuersationis tuae tanto ornamento conueniant sicque exterior homo hoc utatur, inde glorietur, ut interior conscientia uirtutum perfectione solidetur. Habundet in te sincerae caritatis ardor et fructus et uigilantiae tuae studium lucrandis animabus uerbo semper procedat et exemplo. Haec enim, dilecte frater, inter alia multa sunt sacerdotii, haec uere sunt pallei, ut iuxta apostolum inreprehensibilis manens utrobique possis esse conspicuus et intus gerere, quod foris ostenderis accepisse.