REGEST MABILLE: Privilége accordé par les évêques réunis en concile à Pistres, confirmant, à l’instance de l’archevêque Hérard, aux chanoines de Saint-Martin la possession de la villa de Leré et de ses dépendances à eux donnée par le roi Charles-le-Chauve pour leur servir de lieu de refuge en cas d’invasion des Normands, et déclarant des dites possessions exemptes de toute charge et de toute juridiction étrangère.
REGEST EDITION: Dieses Regest ist nicht öffentlich zugänglich.
Datierung: MABILLE: 862 08 20; EDITION: 862 06
EDITION: Hartmann, Wilfried (Hg.): Die Konzilien der karolingischen Teilreiche 860-874, Hannover 1998 (Monumenta Germaniae Historica Concilia 4), S. 118-120.
Utilitas ecclesiasticae doctrinae, licet fluctuoso procellarum turbine feriatur, tamen strenua pontificum solertia optabile salutis percipit remedium, sicque pacis nutritur incrementum et iustitiae decus florescit. Ideoque anno incarnationis dominicae DCCCLXII, indictione decima, anno siquidem piissimi regis Karoli XXIII, cum super fluvium Sequanae in loco, qui Pistas dicitur, unanimiter sacrosanctum concilium pontificum ageretur ex regno magni et orthodoxi Karoli, inter aliqua canonici profectus commoda spiritali aptissima lucro contigit Herardum, venerabilem sanctae metropolis Turonorum episcopum, necessitudinis causas fratrum in monasterio beatissimi et preciosissimi confessoris Christi Martini sancte viventium pandere, qualiter praedictus locus lamentabile devastationis insolitae malum a perfida gente Nortmannorum pertulerit et quomodo metu classici exercitus periculosa pessimi discursus damna perpessus fuerit; manifestavit etiam sicut sacri dominici ovilis pastor isdem pontifex solitam clementiae magnitudinem regiae dignitatis, qualiter concesserit piissimus rex Karolus eisdem fratribus quasdam villas nominatim in praecepto suae largitatis adnotatas, insuper et villam Liradum, ad quam declinationis confugium facerent, si eorum fraternitatem praedictus paganorum incursus pervaderet. Quin etiam nunc, sicut ipso narrante eorum archiepiscopo comperimus, simile persecutionis ex eiusdem gentis feritate detrimentum experiuntur, qui in praefato Ligeris flumine commorantur. Idcirco, quia necessarium duxit eorum pius praesul nobis intimare regiae clementiae consuetum opus, concessionem scilicet supradictarum villarum, ne forte causa varii perfugii sanctitatis culmine pollens fratrum ovile a tramite rectae operationis deviaret, placuit nostrae auctoritatis inviolabili privilegio adnotare regiae munificentiae largitatem. Statuimus igitur, annuente regia dignitate ac clero supplicante, sacrosancti monasterii praestantissimi confessoris censurae nostrae edicto, communi rationis consilio atque decreto, ut praedictae villae seu Liradus stipendiis et necessitatibus fratrum iamdicti monasterii sancti Martini cum universitate appendicium suarum integerrime perpetuo deserviant, ita ut nullus vir has villas de eorum dominatione auferat, quibus misericordiae suae beneficium in hoc munere regia potestas fratribus in eodem caenobio beati Martini morantibus largiri voluit. Qui autem hoc edictum a sanctis patribus institutum irrumpere aut qualibet praesumptione vel occasione conatus fuerit evertere, aeternae damnationis malum cum praevaricatoribus legis sanctae perferat; potestate autem nobis a domino liganda et solvendi caelitus contributa, dicente: Quaecumque ligaveritis super terram, erunt ligata et in caelis et quaecumque solveritis super terram, erunt soluta et in caelis. Hac virtutis confidentia nitentes caeligenae salvationis aditum claudimus obice maliciae suae obiecto sub anathematis vinculo, qui huic necessario beneficio in subtractione praedictae villae consentiens aut operator extiterit, nisi divino fultus suffragio correctionis honore ditatus extiterit. Harum itaque censurarum statuta inconvulse et inviolabiliter a nobis facta in caelo et in terra confirmata manuum subscriptione censuimus corroborare, absentium quoque confratrum voluntatem simili consensua disponimus vigere libramine.
Herardus Turonicae metropolis episcopus huic privilegio consensit.
Wenilo munere divino Senensis episcopus.
Hincmarus sanctae metropolis ecclesiae Remorum episcopus.
Item Wenilo Rotomagensis humilis episcopus.
Rodulfus Bituricensium sanctae metropolis ecclesiae episcopus.
Hildegarius ecclesiae Meldensis episcopus.
Aeneas Parisiorum licet indignus episcopus.
Folchricus indignus episcopus Augustae Tricorum.
Erluinus ecclesiae Constantiae episcopus.
Hildebrandus Sagensis ecclesiae episcopus.
Ragenelmus Noviomagensis ecclesiae episcopus.
Odo Belvacensis ecclesiae licet indignus episcopus.
Gildebertus Carnutensis ecclesiae episcopus.
Cristianus Autisidoriensis ecclesiae episcopus.
Hercanraus Catalaunensis ecclesiae episcopus.
Hilmeradus Ambianensis ecclesiae episcopus.
Ludovicus abbas.
Gauzlinus abbas.
Engelgarus abbas.
Vulfardus abbas.
Itherius abbas.
Froduinus abbas.
Data in mense Augusto, XX ipsius mensis, anno XXIII regnante Carolo rege. Geringus diaconus scripsit.