REGEST MABILLE: Charles-le-Chauve donne aux chanoines de Saint-Martin, afin qu’ils prient pour les âmes de Louis-le-Débonaire, son père, et de sa mère Judith, pour lui, sa femme Hermentrude et pour ses enfants, la villa de Melecey, en Chalonnais, avec toutes ses dépendances ; les chanoines pourront élever un monastère dans la dite villa sans être jamais inquiétés et le lieu jouira des mêmes immunités que les autres dépendances de Saint-Martin.
REGEST EDITION: Dieses Regest ist nicht öffentlich zugänglich.
Datierung: MABILLE: 877 08 01; EDITION: 877 08 01
EDITION: Tessier, Georges (Hg.): Recueil des actes de Charles II le Chauve, Roi de France. Tome 2, Paris 1952 (Chartes et diplômes relatifs a l’histoire de France 8), S. 488-490, Nr. 441.
In nomine sancte et individue Trinitatis. Karolus ejusdem Dei omnipotentis misericordia imperator augustus. Si sacris locis divinis cultibus mancipatis emolumentum imperialis celsitudinis exhibemus servorumque Dei in eisdem degentium necessitatibus opem ferendo consulimus, profuturum nobis hoc ad eterne remunerationis premium facilius obtinendum et ad presentem vitam felicius transigendam fore nullo modo dubitamus. Quocirca noverit omnium sancte Dei Ecclesie fidelium nostrorumque, tam presentium quam futurorum, industria quoniam nos ob amorem Dei et venerationem beati Martini et eterne beatitudinis remunerationem necnon et fratres ipsius cenobii per futura tempora, ut orent pro genitore nostro piissimo augusto Hludovico et pro genitrice nostra Judith imperatrice ac pro salute nostra conjugisque et prolis totiusque imperii statu atque pro Bosone carissimo nostro et Widone, concedimus beato Martino confessori Christi atque pontifici villam nostram, nomine Miliciacum, que est in pago Cabilonensi cum omni integritate sua et quicquid ex eadem villa in quibuslibet comitatibus aspicit seu aspicere videtur quesitum et ad inquirendum et concedendo perpetualiter delegamus. Unde hoc altitudinis nostre preceptum jussimus fieri et cenobio beati Martini jussimus dari, per quod precipimus atque statuendo sancimus ut memorata villa cum omni integritate sua jam dicto Christi confessori fratribusque in ejus cenobio Domino famulantibus data perpetuo jure prefato cenobio sit unita atque indissolubili nexu conjuncta, eo videlicet modo ut a nemine successore nostro per futura tempora a sancti Martini ecclesia valeat separari, sed liceat eisdem fratribus in supradicta villa monasterium edificare et absque alicujus inquietudine pro nobis et Hirmintrude et presenti conjuge cunctaque prole et fidelibus nostris, his videlicet quos ardentiore dileximus amore diuturnis precibus Dominum exorare. Preterea statuentes censemus ut ipsum districtum supradicta villa habeat abhinc sub sancti Martini potestate quod hactenus sub nostra ditione habuisse probatur, necnon et illud statuimus ut nullus judex publicus, comes aut vicecomes aut quelibet secularis potestas supradictam villam ad aliquod seculare negotium exercendum sine predictorum fratrum consensu ingrediatur, sed sit eadem villa sub ea immunitate sub qua et relique res sancti Martini consistunt. Ut autem hujus nostre auctoritatis preceptum pleniorem in Dei nomine firmitatis obtineat vigorem, manu nostra illud firmavimus et anuli nostri impressione subter jussimus assignari.
Signum Karoli gloriosissimi imperatoris augusti.
Audacher notarius ad vicem Gauzlini recognovit et subscripsit.
Data kalendis augusti, indictione decima, anno XXXVIII regni domni Karoli imperatoris in Francia et in successione Lotharii octavo et imperii secundo. Actum Monasteriolo. In Dei nomine feliciter. Amen.