REGEST MABILLE: Charles-le-Chauve, à la demande du comte Vivien, confirme la donation faite par le lévite Amalric, de ses biens, au monastère de Saint-Martin, et la cession par Adalard, de ces mêmes biens, en précaire, aux maîtres des écoles de Saint-Martin, à la condition qu’ils exerceraient gratuitement leur office.
REGEST EDITION: Dieses Regest ist nicht öffentlich zugänglich.
Datierung: MABILLE: 845 01 05; EDITION: 844 01 05, 845 01 05
EDITION: Tessier, Georges (Hg.): Recueil des actes de Charles II le Chauve, Roi de France. Tome 1, Paris 1943 (Chartes et diplômes relatifs a l’histoire de France 8), S. 180-184, Nr. 63.
In nomine Domini et Salvatoris nostri Jesu Christi. Karolus divina providentia rex. Quotienscumque enim petitionibus fidelium nostrorum pro quibuslibet ecclesiasticis necessitatibus aures nostras pulsantium libenter annuimus et ad divinae potentiae in locis Deo dicatis famulandum opem ferimus, id omnino ad statum regni nostri plenius muniendum temporalemque vitam melius deducendam necnon etiam futuram felicius capessendam commodum fore minime dubitamus. Idcirco noverit omnium fidelium sanctae Dei Ecclesiae nostrorumque industria, videlicet tam praesentium quam futurorum, quia venerabilis fidelis noster Vivianus comes suggessit culmini dignitatis nostrae quod quidam levita ex coenobio praeclarissimi confessoris Christi sancti Martini, peculiaris patroni nostri, nomine Amalricus, quoddam proprium hereditatis suae sive adtractus sui legaliter obtulerit Deo et sancto Martino deprecatusque fuerit per seriem precariae beneficiolum suum ex rebus ejusdem ecclesiae, eo scilicet tenore ut utrasque res diebus vitae suae idem Amalricus, Milo atque Guichardus habeant eorumque successor quicumque fuerit praeceptor in scola sancti Martini, nec inibi de doctrina quorumque discentium meritum recompensationis quaerant aut exigant nisi quod sponte oblatum sit, neque abbas ejusdem monasterii quilibet deinceps plus servitii alicujus muneris petat vel licentia exigendi ab his eorumque successoribus idem ministerium habentibus perfrui queat quam ut gratis in scola petita doceant necnon fidelissime ibi laborem docendi impendant. Igitur petiit serenitatem pietatis nostrae, ob amorem et honorem Domini reverentiamque beati Martini peculiaris [patroni] nostri, ut hoc ipsum nostra auctoritate dignaremur confirmare more regali. Nos quoque, salubri suggestione permoti, simul etiam hortatu atque interventu venerabilium virorum ad hoc perficiendum commoniti, hoc nostrae auctoritatis praeceptum fieri ac dare decrevimus, per quod constituimus atque perenniter firmum fore decernimus ut, sicut superius dictum est et in serie precariae videtur insertum esse, sic in honorem loci et cumulum mercedis nostrae sive Viviani, fidelissimi nostri, firmum permaneat omni tempore. Insuper etiam addimus X quartas per hanc nostrae praeceptionis auctoritatem in ipsa eademque conditione praedicta quae nuper eidem Amalrico concessa fuerant in beneficium habenda. Unde monemus quoque omnes qui nobis in regno a Deo commisso successuri sunt ut, sicut sua statuta a successoribus suis conservari velint, ita in omnibus hanc nostram praecepti auctoritatem super precariam actam ad eam confirmandam immutabiliter perpetuis temporibus conservare studeant ad suam et nostram communem utilitatem sive salutem. Et ut haec nostrae auctoritatis praeceptio firmior habeatur ac per futura tempora melius conservetur, manu propria subter eam firmare decrevimus et de anulo nostro sigillari jussimus.
Signum Karoli gloriosissimi regis.
Bartholomaeus notarius ad vicem Hludowici recognovit et subscripsit.
Data nonas januarii, anno quinto regnante domno Karolo gloriosissimo rege, indictione septima. Actum Turonis in monasterio sancti Martini. In Dei nomine feliciter. Amen.