Richilde, femme de Roger de Vendôme, donne en mourant à Saint-Martin, pour le salut de son âme et celle des siens, ce qu’elle avait en domaine dans son alleu de Ville-Bresme. Plus tard, ses fils élèvent une revendication, à laquelle les moines mettent fin en donnant un chanfrein à l’un et à l’autre une paire de chaussures écarlates.
Notum fore volumus omnibus sancte Dei ecclesie fidelibus, quod Richildis, uxor Rotgerii de Vendosmio, moriens, dedit Sancto Martino hoc quod in dominio habebat in suo alodo quod dicitur Villa-Bresma, scilicet tertiam partem tam de bosco quam de plano, pro redemptione anime senioris sui, et sue filiorumque suorum, Ugonis videlicet, Rotgerii, Rainaldi, Ivonis, Rotberti quemquidem alodum postea tenuerunt monachi Sancti Martini, multis annis, solidum et quietum. Sed nunc, instigante cupiditate, duo ex filiis suis Rotbertus et Ivo calumniam de hoc inferre presumpserunt. Quapropter nos Sancti Martini reclamantes, ipsique gratia Dei, rationem recognoscentes coram hominibus patrie, omnem finem fecimus, namque matris sue elemosinam annuerunt Sancto Martino, nemine reclamante. Et ut hec noticia absque calumnia in perpetuum firma sit, dedimus Ivoni unum chanfrenum et Rotberto unas caligas vermiculas. Ad hanc vero conventionem audientes et videntes hi fuerunt producti testes, quorum nomina subter habentur scripta:
| S. Rainaldi | S. Guillelmi sacerdotis |
| S. Arnulfi | S. Henrici sacerdotis |
| S. Guillelmi | S. Constantini sacerdotis |
| S. Odonis clerici | S. Fulcherii filii Hugonis. |
| S. Augerii clerici |