Le chevalier Hugues, au souvenir de la multitude de ses fautes, craignant le jugement dernier, fait l’abandon à Dieu et à Saint-Martin de son alleu de Bezai, dans le Vendômois, tant pour le salut de son âme que de celle de ses proches.
Datierung: Vor 1040
Quisquis divine retributionis flagrat amore quatinus, post devictum huius transitorii seculi certamen, mereatur voce piissimi iudicis optantissima quiete consolari, consequens atque dignissimum credimus et confitemur ut et hic fideli sanctione, misericordia Dei cooperante, provehi ad incrementa sancte conversationis atque devotionis spe et ambitione tendat et quicquid aut fastus inique vite contulerit, aut inertia humane imbecillitatis, ut assolet fieri mortalibus, indixerit pro vectu et supplemento piissimarum precum sanctorum sublevetur; itaque ego, in Dei nomine Hugo, vir armis militaribus deditus, reminiscens meorum multitudinem peccatorum et ultimi iudicii diem fortiter expavescens, atque cum electis quibus Deus in illa dicturus est die: „Venite benedicti patris mei, percipite regnum quod vobis paratum est” aggregari desiderans, concedo Deo et Sancto Martino in loco Maioris Monasterii, aliquid de rebus meis quod mihi a parentibus meis precedentibus dimissum est, videlicet alodum meum in pago Vindocinensi constantem, in villa que nuncupatur Buziacus, tam pro anime mee quam pro absolutione animarum patris mei et matris, nec non pro salute filiorum ac filiarum mearum, eo etiam modo trado predictum alodum, iam dicto loco et monachis ibidem deo servientibus, ut ab hodie et in antea libere et quiete possideant, nemine contradicente. Si quis autem de heredibus meis, aut aliqua intromissa persona, contra hanc donationem, quam libera mente et propria voluntate ex rebus mihi a progenitoribus concessis faci, aliquam calumniam monachis, post meum decessum, inferre voluerit, nisi cito humiliatus ad eos proferens emandationem venerit, in primis Dei omnipotentis et perpetue Virginis Marie atque omnium electorum Dei iram incurrat, et cum Iuda traditore atque Simone mago vivus in infernum descendens, semper ibi ardent, ac deinde irritum fiat quod vindicat. Ut autem hec auctoritas pleniorem in Deo optineat firmitatem, manu propria eam sub signo sancte crucis firmavi manibusque filiorum nec non et fidelium meorum affirmare rogavi +.
Signum Hugonis archidiaconis filii eius. – S. Odonis filii eius. – S. Hervei filii eius. – S. Gausfredi filii eius – Item filii eius Gisleberti – S. Hugonis. – S. Hervei militis eius. – S. Rotberti Marcelliacensis. – S. Frotgerii. – S. Helgodi. – S. Lamberti vicarii. – S. Gualterii. – S.Rainardi. – S. Christiani maioris.