None
Datierung: 1095
Noverint omnes quod domnus Ebrardus de Puteolo monachus noster, assumpto secum domno Bernardo monacho, panetario nostro, cognomento Flagello, adiit nepotem suum ejusdem nominis Ebrardum de Puteolo, quando volebat ire in Jerusalem cum exercitu christianorum contra paganos, id est, anno ante dedicationem Majoris Monasterii ab Urbano papa factam, hortaturus ipsum ut aliquid ex rebus suis daret beato Martino Majoris Monasterii et nobis ejus monachis, quo facilius posset a nobis impetrare quatinus anniversarium fratris sui secundum carnem Hugonis de Puteolo, patris ejusdem nepotis sui, quod eatenus faceramus solo rogatu et amicicia ipsius, ordinaremus et statueremus, tam a nobis quam a successoribus nostris, omni anno faciendum. Cujus ille adventu percognito, processit ei obviam cum tribus militum suorum, Gausfredo scilicet Britone cognato suo, et Odone Malis Herbis, et Adelardo preposito suo de Carnoto et obviat ei in campestribus Blesensis pagi. Cui cum propter quod venerat edixisset, ille reverentia qua debuit admonitionem avunculi sui excepit et opere complevit. Dedit igitur Deo et beato Martino atque nobis intentione supradicta, id est ut, propter ipsius quoque amorem et beneficium, facilius impetraret a nobis avunculus suus quatinus anniversarium patris sui annis singulis feceremus, quicquid omnino possidebat apud Maierolias et Periacum in Blesenci pago sitas, tam in servis et ancillis et colibertis quam etiam in terris cultis et incultis, domibus, vineis, redibitionibus et consuetudinibus atque omnibus aliis ad ipsas villas quolibet modo pertinentibus; nichil inde sibi retinens sed omnia sic lib(era) …… quieta, sicuti ipse ea die ipsa possidebat, nobis possidenda tribuens. Cui dono vineam unam apud Sanctum Victorem sitam atque domum ……. ro Blesi, quae fuerant Odonis clerici, quem a servitutis conditione liberaverat, super addidit. De quibus omnibus ibidem posuit donum in manu domni Ebrardi avunculi sui, per cultellum Odonis supradicti militis sui, atque ipsum cultellum misit nobis per manum domni Bernardi Flagelli monachi. Cujus rei testes sunt ex parte ipsius: tres milites suprascripti; ex nostra autem parte de monachis: preter domnum Ebrardum de Puteolo et domnum Bernardum Flagellum, domnus Teduinus prepositus noster de Carnoto, domnus Gaulterius prepositus villae Nantulfi; de famulis: Rainaldus Butatus, Herveus Brito, Rotbertus de Chinsiaco, Mainerius famulus.Sciendum preterea quod Hugo, cellerarius de Novo Vico, calumniatus est nobis supradictam domum atque vineam, quae fuerant Odonis clerici, reclamans in eis jus ex parte conjugis suae, jure propinquitatis; sed in colloquio quodam, apud villam, quae Halena dicitur, habito, derationatus est domnus Ebrardus de Puteolo monachus noster contra eum, quod nichil juris, ipse vel uxor ejus, in eis haberet et quod ejus calumnia injusta esset. Sicque ille calumniam illam dimisit et donum supradictae domus et vineae ratum et stabile permansit. Cui rei interfuerunt testes hii: supradictus Ebrardus filius Hugonis de Puteolo, ipsius castri post obitum patris dominus, et mater ejus Adelicia nomino, et Hugo frater ipsius Ebrardi, qui totum suprascriptum donum fratris sui ibidem concessit et auctorizavit; Gilduinus quoque et Gualerannus fratres ipsorum, Gausfredus Brito cognatus eorum, Rotbertus Normannus, Berardus filius Bosonis, Albertus siniscalis de Halena, Tetbaldus filius Tedulli. De monachis: domnus Ebrardus de Puteolo, Bernardus Flagellus, Hildegarius prior cellae de Puteolo, Gausfredus de Vilcello et famuli eorum, Herbertus presbyter de Puteolo, Algerius filius Arnulfi Gazelli, Rotbertus de Chinciaco et quartus famulus domni Gausfredi de Vilcello, nomine ……. et alii multi.