Sentence de Gervais, évêque de Sées, qui adjuge au prieuré de Bellême le droit de patronage de l’église de Bellavilliers, contre les prétentions de Etienne de Pontlevin, curé de ladite église. [Biens situés à Bellavilliers]
Christi fidelibus presentes litteras inspecturis Gervasius, divina permissione dictus episcopus Sagiensis, salutem in omnium Salvatore. Noverit Universitas vestra quod cum prior et monachi de Belismo nobis conquerendo monstrassent quod Stephanus de Pontlevein, persona ecclesie de Bellaviller, jus patronatus ejusdem ecclesie ad ipsos pertinere negasset, presentibus convocatis et in nostra presentia constitutis, idem Stephanus, de veritate dicenda juramento astrinctus, publice recognovit in jure quod jus patronatus ecclesie de Bellaviller, pertinebat indubitanter ad priorem et monachos de Belismo. Ut autem de recognicione facta constet imperpetuum universis, nos in ipsius testimonium dictis priori et monachis presentes dedimus litteras sigilli nostri impressione munitas. Actum anno gratie Mo CCo XXo quarto. VALETE.