Sentence de Lisiard, évêque de Sées, qui adjuge au prieur de Bellême un trait de dîme que lui contestait Jérôme Bigot, de Bellavilliers. [Biens situés à Bellavilliers]
Dating: Entre 1185 et 24 septembre 1201
Universis sancte Ecclesie filiis ad quos presentis scripture pagina pervenerit, Lisiardus Dei gratia Sagiensis episcopus salutem in Domino. Ad omnium noticiam volumus pervenire quod cum inter priorem et conventum de Belismo, ex una parte, et Gerum Bigot, ex alia, controversia verteretur super quodam tractu decime de Bellaviller, quod idem Gerum ad se pertinere dicebat, tandem partibus in presentia nostra constitutis, hujusmodi controversia talem finem amicabiliter est sortita. Memoratus Gerum tractum illum confessus est ad priorem et monachos de Belismo pertinere et se in illo nullum jus habere, et etiam, si aliquid ibi jus habuisset, priori et monachis illud integre relinquebat. Promisit etiam idem Gerum quod si aliquis dictum priorem et monachos super illo tractu de cetero molestabit, ipse illis se prebebit omnimodis adjutorem. Hoc tamen excepto quod propter hoc propriis sumptibus adjutor ecclesie non tenebitur. Prior vero, pro dicti Gerum testimonio et auxilio super hoc habendo, ei XV solidos Perticensis monete protinus erogavit. Nos vero, ne super hoc iterum contentio moveretur, hanc pacis formam presentis pagine attestatione et sigilli nostri auctoritate duximus roborandam. VALETE.