Charte notice relative au même sujet que la précédente. [Saint-Léonard-de-Bellême]
Datierung: Vers 1074
Propter aliquorum improbitates episcoporum, qui sancte matris Ecclesie libertatem adnulare cupientes, clericos vel monachos in sinu ipsius Ecclesie Domino militantes infestare non metuunt, placuit nocioni posterorum literis mandare quod Robertus, Sagiensis Ecclesie pontifex, tentavit ecclesie Sancti Leonardi de Belismo consuetudines, quas non debuit, imponere. Eo namque tempore, quo domnus Rotgerius de Montgommerici, jure hereditario Belismum regebat, accidit ut supradictus episcopus, sicut et alii, Ernaudus scilicet Cenomanensis et episcopus de Lisoiis et plures abbates ad festivitatem Sancti Leonardi veniret. Et quare mos episcoporum est in festis diebus missam celebrare, placuit ut Sagiensis episcopus, in cujus diocesi ipsa ecclesia erat, quamvis libera et ab omni episcopali sive laicali consuetudine absoluta, missam cantaret. Qui avaritia victus, temptavit sibi retinere ejusdem oblationes misse, quod nullus ante eum episcopus fecerat. Sed canonici, qui tunc aderant, et nuncquam hoc viderant, privilegium suum infringere non patientes, vellet nollet episcopus, acceperunt sibi oblationem, sicut consuetudo eis fuerat. Qua de re idem episcopus commotus adversus canonicos in iram, vocavit eos inde ad placitum. Illi vero, conductu Rogeri comitis, venerunt Rotomagum, ante regem Willelmum et reginam Anglorum. Qui, diligenter rem discutientes, interrogaverunt Sagiensem episcopum quid in aeclesia S. Leonardi quereret? Ille autem, sicut in omnibus sue diocesis aeclesiis, dixit in ea se habere. Canonici vero privilegium suum ostenderunt, et antiquos homines secum adduxerunt qui ipsam ecclesiam, ad dedicationem, ita regi Gallie Rotberto et Normannorum comiti Ricardo et Sagiensi episcopo Ricardo et multis cum eisdem episcopis et abbatibus et comitibus et baronibus franchire et ordinare viderunt, ut nullus christianus in ea aliquam consuetudinem haberet; inter quos Johannes Rottomagensis archiepiscopus et Rotgerius de Bellomonte, jussu regis fecerunt judicium et dixerunt quod quidem Rex et principes, qui ipsam terram cum eo gubernabant, ordinaverunt et statuerunt non posse infringi, presertim cum ipse archiepiscopus multa in suo episcopatu ecclesias haberet, in quibus nichil accipiebat. Huic judicio consenserunt Rex et Regina et qui cum eis erant : Rotgerius de Monte-Gomerici, Rodbertus de Veteri-Ponte, W. de Feritate, Mathelinus de Axe, Basuinus et Willelmus, canonici, Garinus Curvis, Ameslandus et multi alii quorum nomina propter proxilitatem tacuimus.