In nomine sancte et individue Trinitatis. Ego Guillelmus, Dei gratia Cenomanne[n]sium episcopus, notum fieri volo omnibus sancte Ecclesie fidelibus quoniam, propter amorem et familiaritatem quibus Cenomannensis et beati Martini Majoris monasterii ecclesia solide dileccionis vinculo ad invicem jungebantur, dedi et concessi beato Martino et fratribus in ejus monasterio Christo in perpetuum servientibus ecclesiam Sancti Hylarii de Huseio cum duabus partibus decimarum et primiciarum et oblacionum V festivitatum, salvo jure Cenomannensis ecclesie, presente et concedente Eustachio archidiacono. Et ne cujusquam in futuro male invida presumcione violetur, proprii sigilli munimine confirmamus.