Willermus, Dei gratia Cenomanensis episcopus, universis fidelibus salutem. Nos intelligentes quod veritas sub scripti authoritate tutior debeat conservari, notum fieri curavimus nos intuitu divine pietatis et ex racione familiaritatis qua ecclesie Majoris monasterii sincera caritate uniti tenebamur, monachis ejusdem monasterii in perpetuum dedisse et concessisse ecclesiam Sancti Hylarii de Housseyo cum duabus partibus decimarum bladi et vini ultra aquam de Goece, que due partes cum tertia parte rectoris predicte ecclesie tracte erunt insimul in prioratu suo de Origneio in futuram cum duabusque partibus primitiarum tocius parrochie et cum duabus partibus oblacionem quinque festivitatum anni, videlicet Nativitatis Domini, beati Hylarii, Purificationis beate Marie, Pasche et festo Omnium Sanctorum, ita tamen quod rector predicte ecclesie qui pro tempore fuerit solvet super tertia parte sua de cetero synodum jusque Cenomanensis ecclesie, procuraciones et redevencias archidiaconi et decani pro se, pro prioratu capelle de Origniaco, et due partes premissorum cum predicto tractu predictis monachis remanebunt integre et perfecte. Et hoc concesserunt Nycholaus, decanus ecclesie nostre, illius terre archidiaconus, et Raginaldus de Asneriis, ejusdem terre archipresbyter. Et quod id fidelius in perpetuum conservetur, idem literis annotari et sigillo nostro fecimus communiri.