None
Datierung: Jun. 1067
Nosse debebitis si qui eritis posteri nostri, Maioris scilicet huius habitatores Monasterii Sancti Martini, Girardum filium Herberti de Balgenciaco calumniam intulisse nobis ex parte uxoris suae nomine Adeladis, filiae Landrici Balbi, super rebus servorum quondam nostrorum Ohelmi et filii eius Ascelini, propter Hilduciam, Ascelini matrem, uxorem Ohelmi, quae fuerat quidem Herbaldi avi iamdictae Adeladis ancilla, a Rotberto Blesensi vicecomite illi donata, sed ab ipso postea Herbaldo, annuente eodem vicecomite Rotberto libera facta; ac deinceps, cum Rotberti et Herbaldi filiis calumniam ipsam emovere temptantibus iudiciis publicis et congruis concordationibus, nostra iam olim erat contentio complacata; cumque nos et iste Girardus ob eamdem diutius calumniam fatigasset, ac tandem bellum, a nobis ipsius violentia coactis, contra iniusticiam eius arramitum, locoque et die condicto paratum de more fuisset, utrisque ad postremum placuit pacifice rem finiri. Centum itaque solidos a nobis idem Girardus accepit, et XXti uxor eius Adeladis cum liberis suis, per manum domni Odonis, nostri per id tempus prioris ac sie quicquid propter Hilduciam illam, quolibet modo, sive iuste sive iniuste reclamare poterant, solidum nobis et quietum perpetuo guerpiverunt. Petivit autem saepedictus Girardus ut sibi quicquid nobis forisfecerat ea de causa perdonaretur. Et perdonavit ei vice omnium nostrorum prior noster supradictus et si non depredationes pauperum, quod non poteramus, tamen iniurias et damna nostra quantum perdonare possemus. Pro quo osculatus est ille Girardus manum ipsius, deinde revestitus est ab ipso de toto nostro deinceps benefacto. Actum est hoc in Blesensi castro, in prato videlicet inter turrim et aulam comitis sito; anno ab incarnatione Domini M LXVII, praesidente nobis anno IIIIo domno abbate Bartholomeo, mense iunio. Testibus istis: Hugone preposito, Galterio Pane parato, Rodulfo, vicario Blesensi, Rotberto et Teduino, filiis Teduini de Sancto Bricione, Guarino, filio Gradulfi, Rainaldo, vicario de Calvo Monte. De nostris: Isemberto monacho, Fulberto monacho, Michaele Rufo, Drogone monacho, Giraldo coquo, Fulberto de Orcasa. Post haec idem noster prior castrum petens Balgentiacum, datis ut suprataxatum est uxori Girardi XV. solidis et V. totidem liberis suis, singulis scilicet XII. denariis, de nostro quoque benefacto revestivit ipsos, atque guerpitionem suprascriptam ei quam Girardus ipse Blesi fecerat annuendo fecerunt. Sed et hic testes huius affuerunt: Hainricus de Balgentiaco, Alguinus levita, Bernardus, famulus prioris, Guarnerius sacerdos, Bernerius, Teodericus Bastardus, Vivianus nimium habens Frumentum, Hugo monachus, Fulbertus, famulus Hugonis, Guarinus sacerdos, Frotmundus de Memberolis. Nomina filiorum Girardi et Adeladis: Landricus, Hainricus, Gelduinus, Aiga, Marburgis.