None
Datierung: 1212
Raginaldus Dei gratia Carnotensis episcopus universis presens scriptum inspecturis in Domino salutem. Universitati omnium notum facimus quod de contentione illa que inter priorem et monachos Sancti Egidii de Montiniaco ex una parte et Hubertum presbiterum eiusdem ecclesie ex altera vertebatur, super oblationibus que ex devotione fidelium ad eandem deseruntur ecclesiam, pax est in hunc modum reformata, videlicet quod partes illas oblationum quas dicti prior et monachi in eadem ecclesia ad subscriptos terminos percipiebant, scilicet in parasceve Domini et in die pasche duas partes oblationum et in crastino pasche duas partes panum, ibidem oblationum, et in ascensione dominica similiter duas partes, in vigilia et in die Sancti Egidii medietatem omnium oblationum et in festo omnium sanctorum duas partes, ad natale autem Domini similiter duas partes et in crastino duas partes panum, et in purificatione Beate Marie duas partes omnium oblationum, et preterea omnes alias oblationes que ceteris diebus tam per manum monachorum quam aliorum possent evenire, prenominato sacerdoti quandiu viveret, concesserunt habendas ad firmam quinquaginta solidorum, predictis priori et monachis his terminis reddendorum, scilicet ad dictam parascevem quinque solidos, ad pascha decem solidos, ad ascensionem Domini quinque solidos, in festo sancti Egidii decem solidos, in festo sanctorum omnium quinque solidos, ad natale Domini decem solidos, et ad purificationem sancte Marie quinque solidos. Preterea omnes garbe de decimis territorii Montiniaci, que in ipsorum monachorum granchiam apud Montiniacum debent deportari, insimul asserentur et omnis bladus ex ipsis progrediens insimul conservabitur, de quo presbiter pro mestiva unum modium annuatim percipiet et unam areatam straminis. Predicti autem prior et monachi de blado illo, si voluerint, capient, sciente tamen presbitero supradicto. Idem etiam presbiter habebit terciam partem minutarum decimarum parrochie Sancti Egidii et partem candele Sancti Bartholomei, quam monachi habebant, pro qua idem presbiter reddet partem illam synodi, quam monachi reddere tenebantur. Sciendum vero est quod memorate partes oblationum omnium et memorata pars candele Sancti Bartholomei quas dicti prior et monachi in iamdicta Sancti Egidii ecclesia ad suprascriptos terminos percipere solebant ante hanc compositionem, in eorum usus post decessum presbiteri predicti, ut prius, devoluentur. Nos igitur compositionem hanc approbantes et ratam habentes, ipsam fecimus scribi, et sigilli nostri impressione confirmari. Actum est hoc apud Carnotum anno gratie millesimo ducentesimo duodecimo, mense iunio.