None
Datierung: 1212
Frater J. Sancti Juliani abbas, J. decanus et G. archidiaconus Turonensis, omnibus presentes litteras inspecturis, salutem in Domino. Universitati vestrae volumus innotescat quod cum inter dilectos in Christo abbatem et conventum Maioris Monasterii ex una parte et Rolandum personam ecclesiae Sancti Salvatoris de Montigniaco ex altera, super partitione reddituum et oblationum eiusdem ecclesiae inter Rolandum et priorem facienda et rebus aliis, quae inferius exprimuntur, coram nobis auctoritate apostolica contentio fuisse agitata. Tandem cum lite contestata, testibus receptis et omnibus aliis rite peractis, ad sententiam vellemus die data procedere, dilectis in Christo Guillelmo sacrista Maioris Monasterii, Guillelmo preposito capelle, Stephano Turonensi, et Oliverio priore Montigniaci pro se et dictis abbate et conventu et predicto Rolando propria in persona comparentibus coram nobis, ad nostram et aliorum bonorum virorum sollicitudinem, inter partes pax et amicabilis compositio intercessit in hunc modum: Prior Montigniaci in VIIem festis videlicet natali Domini, purificatione beate Marie, die sancto parasceve et in pascha Domini, ascensione Domini, festo omnium sanctorum et festivitate sancti Salvatoris, duas portiones omnium oblationum sine contradictione percipiet, tercia parte Rolando et eius successoribus libere remanente. Licitum autem erit persone vel illi qui missam celebraverit, duos nummos tantum de communi divisim quatuor pauperibus erogare. Similiter vero de communi due nummate in census quolibet dictorum festorum ementur, et duo similiter denarii clerico ecclesiae festis singulis donabuntur. In festo autem omnium sanctorum et sancti Salvatoris ante adventum Domini et in purificatione beate Virginis dictus prior vel aliquis monachorum Maioris Monasterii altam, si voluerit, missam celebrabit. Quam si duxerit celebrandam persone si presens fuerit vel eius capellano et tenetur sero precedenti declarare. In panibus etiam consuetudinariis, qui in crastino nativitatis dominice et crastino sancti pasche et die ascensionibus Domini oblati fuerint, percipiet prior duas portiones et persona vel eius mandatum terciam. Qui si diebus prenotatis oblati non fuerint, presbiter parrochianos suos, qui panes debuerunt ad eorum solutionem, per censuram ecclesiasticam compellet, et prior nichilominus quandocunque oblati fuerint duos exinde sicut dictum est percipiet portiones. A. prestatione vero straminis panis et vini, quod dicta persona ad ecclesiam in dictis festis adornandam a priore exigebat, erit idem prior absolutus quod si aliquando gratis prestiterit, huiusmodi tantum prestatio trahi non debet ad consequentiam in futuro. Porro cum prior duos modios annone annui redditus, quos persone debet, sibi reddiderit ad perficiendam, mensuram superaddet utrique modio unam minam. Ita tamen quod si contigerit minam patrie ad eo maiorari, ut modius minam superadditam integre contineat, prior absolutione mine predicte deinceps erit penitus absolutus. Decimam vero fructuum vinearum ad presbiterum spectancium uvis nondum calcatis percipiet dictus prior libere et quiete. Dicti autem sacrista, prepositus, Stephanus et prior Montigniaci pro se et abbate et conventu in verbo veritatis, et dictus Rolandus fide mediante firmaverunt quod dictam compositionem perpetuo fideliter observarent. In cuius rei memoriam ad partium petitionem presentes litteras conscripbi et sigillorum nostrorum impressione fecimus communiri. Actum anno Domini Mo CCo XIIo, tempore domini Hugonis abbatis, et Oliverii tunc prioris Montigniaci.