None
Datierung: 1212
Fratres capituli Maioris Monasterii et frater Hugo eorum humilis minister, omnibus presentes litteras inspecturis, salutem in Domino. Universitati vestre volumus annotescat quod Oliverius tunc temporis prior Montigniaci, de assensu et voluntate nostra, tradidit et concessit Rollando, personae ecclesiae Sancti Salvatoris de Montigniaco quicquid in oblationibus eiusdam ecclesiae habere dinoscitur, sub annua firma quadraginta solidorum, de quibus, natali Domini septem solidos, et in purificatione Virginis beate Mariae quinque solidos, die sancto parasceve quinque solidos, die resurectionis dominicae octo solidos, ascensione Domini quinque solidos, festo omnium sanctorum quinque solidos, et festivitate sancti Salvatoris quinque solidos, annuatim persolvet supradicto priori, in quibus festis predictis duas partes omnium oblationum iure proprio possidemus libere et habemus. Concessit etiam prenominatus prior eidem Rollando duas portiones quas habere dinoscitur idem prior in panibus consuetudinariis, qui in crastino natalis Domini et in crastino Sancti Paschae et die ascensionis Domini debent reddi quandocunque fuerint persoluti. Et sciendum quod hec omnia superius annotata ad vitam superdicti Rollandi tantummodo sunt concessa, ita quod successores eius non possint nobis in posterum super concessione ista aliquod preiudicium facere. Quod ut ratum et inconcussum permaneat, presentes litteras scribi et sigilli nostri fecimus munimine roborari. Actum anno Domini Mo CCo duodecimo,mense februarii.