«Don fait au prieuré de Lavardin de la terre de Varenne, par Bouchard, l´occasion de la mort de sa femme, dame de Lavardin.»
Datierung: Avant 1185
Lacrimabili stilo, tam presentibus quam futuris, notificari uolumus Agatham, huius uille dominam, in communem omnium matrem, in die exaltationis sancte crucis, uniuerse carnis debitum persoluisse, pro cuius anime redemptione Burchardus eius sponsus, Johannis vindocinensis comitis filius, Lauarzini monachis ibidem degentibus, omnem suam terram propriam Uarene, que est extra fossas culture dedit, et insuper pasnagium Gastine de suis propriis porcis. Hoc donum fecit in ecclesia sancti Martini, quadam die dominica, processione finita, coram his militibus: Hugone de Fractaualle et fratribus eius, et Guilermo unbredana, et Gofrido de Uentiaco, et Guillelmo de monte Ernaudi, et Arnulfo cocherei, et coram Huberto priore, et aliis monachis, et coram omnibus, tam uiris quam mulieribus, qui circum astabant. Hoc dono hereditauit ecclesiam cum quodam baculo, quem super altare posuit ipse et filii eius, Radulfus scilicet et Gofridus, et Agnes soror eorum. Pro hac elemosyna statuerunt monachi eiusdem loci singulis diebus unam missam, pro anima Agathe, et pro animabus antecessorvm SVORVM.