«Notice d'un acte par lequel Beringer, chevalier d'Amboise réclame la commandise sur la terre de Pasnelle, et par le même acte appert qu’il est forcé par les religieux de MM. d'abandonner lad. prétention, et de leur rendre ce qu’il leur avoit pris.»
Datierung: Vers 1050
Nosse debebitis si qui eritis posteri nostri maioris scilicet huius habitatores monasterii sancti Martini Beringerium quemdam militem Ambaziacensem, filium cuiusdam Ingelgerii, reclamasse commendisiam in terra nostra de pasnageriis, preterque hanc etiam in terra quam dono Odonis comitis atque Tetbaldi filii sui, extirpata parte quadam bosci blimartii, predictis scilicet pasnageriis contigua, vel nos colebamus vel nostri coloni. Hinc etiam nos predavit, eamque predam, accepto sequendi publicum rectumque iudicium fidejussore, remisit. Unde tandem placito coram Gauffredo andecavensi, comite Turonis in sua curia constituto, in id demum est aducta publici sententia postrema iudicii, ut antiquus aliquis terre illius incola, qui rem bene nosset, contra hominem Beringerii, sumpto scuto baculoque defenderet, in eadem bosci blimarii terra nobis ab Odone comite Tetbaldoque donata, consuetudinem illam commendisie tempore Fulconis comitis minime fuisse. Ad hoc paratum hominem habuimus. Appropinquante autem statuta certaminis die, cum hoc Beringerius apud Ambaziacum, non Turonis, ubi iudicatum fuerat, diceret faciendum, monachus noster nomine Gualterius, illius ipsius terre nostre tunc, temporis prepositus, Gauffredum comitem Andecauis expetiuit, atque ab eodem impetravit, uti Beringerio mandaret Turonum venire. publicoque iudicio ibi decretam legem ad usque finem exequi, ut rectitudo poscebat ibidem. Ita dumtaxat, ut quia victus copiam in eadem urbe minus haberet, ab eodem monacho cum tribus suis hominibus ibi pasceretur, quo usque imposite legis executio finiretur. At Beringerius audito hoc nec acceptato mandato, nichil omnino cur refuraret causatus est, sed absolutissime testatus est numquam se suumue hominem extra Ambaziacum causa illius exequende legis iturum. Nos itaque die tota locoque quo debuimus ad rem peragendam cum campione nostro parati fuimus. Ille venire noluit, et post paucos dies fideiussorem supramemoratum predauit. Sed predictus frater noster Gualterius Ambaziacum veniens, publicoque rursus adversus illum interpellato iudicio, predatorem ipsum convicit iniustum, atque cum emendatione legali predam ipsam reddere coegit. Testes omnium quae diximus subter annotamus, non quidem omnibus omnia, sed aliis testificantibus alia pro loco vel tempore, quo gesta sunt singula:
| Archembaldis filius Ulgerii Gauffredus fualdus Albertus praepositus Gauffredus suus senescalcus | Gualterius titio Lodonus loripes Fulcodius de tauriniaco Arnulfus filius Leonii |
| Lescelinus de Ambaziaco. | |