(C.) In nomine sanctae et individuae trinitatis. Hludouuicus divina favente gratia rex. Si locis deo dicatis nostrae regiae potestatis compendium impenderimus, hoc nobis ad aeternae retributionis praemia capessenda profuturum liquido credimus. Quapropter noverit omnium fidelium nostrorum tam praesentium quam et futurorum industria, qualiter piissimus genitor noster ob amorem domini et pro suae mercedis augmento tradidit traditasque firmavit quasdam res proprietatis suae ad cappellam suam ad Franconofurt, quae est constructa in honore salvatoris domini nostri Iesu Christi, hoc est illam cappellam ad Cufstein et illud monasterium ad Ursella et illam aecclesiam in villa quae vocatur Steti et illam aecclesiam ad Plagestat et illam villam quae dicitur Pargilla cum aecclesia et decima ad eam pertinente, sicut eam Ruotkerusin beneficium habuit, et illam aecclesiam ad Sprendilingun cum illo manso, qui ad eam pertinet, et illam aecclesiam ad Biscofesheim cum omni decimatione cum mancipiis et terris ad eam pertinentibus, et quod Ruotkerus habuit in villa Seckibah, [et] illam aecclesiam ad Sueinheim cum omni decimatione cum mancipiis et terris ad eam pertinentibus et tres mansos ad Gelstrebah et illam cappellam ad Nerenstein cum omnibus ad eam pertinentibus, sicut eam Aaron ibi in beneficium habuit, [et] illam villam quae dicitur Kadelcamf cum omnibus appenditiis et illam cappellam in Burma et sicut Heririh in beneficium habuit in Osterenaha et quod Ruotlind ad ipsam cappellam tradidit, scripto confirmavit. Has itaque praescriptas res cum omni integritate, id est cum omnibus ad eas pertinentibus in domibus aedificiis mancipiis campis agris pratis pascuis vineis silvis cultis et incultis aquis aquarumque decursibus mobilibus et immobilibus, ad iam dictam cappellam pius genitor noster tradidit atque transfudit, ut deinceps perpetualiter ad dei servitium peragendum ibi permaneant absque ullius contradicentis obstaculo. Et constituit, ut in eodem loco ad serviendum domino consistant clerici XII, exceptis praesbiteris, qui in locis illuc pertinentibus domino famulantur, et hi omnes de praescriptis rebus habeant stipendia necessaria, et ab illo abbate, cui ipsa cappella commissa fuerit, nulla umquam hostilis expeditio exigatur. Insuper etiam praecepit, ut abba Uuilliherius, cui ipsa cappella commissa est, diebus vitae suae eam securiter habeat cum omnibus ad eam pertinentibus, nec ullus inde ei quicquam auferre praesumat, sicuti regiae partis tunc in beneficium habere visus fuit, cum omnibus praescriptis et iure ac legitime ad ea pertinentibus in decimationibus seu aliis appenditiis. Nos igitur paternae traditioni consentientes iussimus fieri hoc nostrae consensionis conscriptum, per quod volumus atque praecipimus, ut, sicut pius genitor noster praescripta omnia constituit atque firmavit, ita deinceps firmata et stabilita permaneant absque ullius contradicentis aut inquietantis obstaculo. Et ut haec nostrae consensionis auctoritas firmior habeatur et per futura tempora a fidelibus nostris melius credatur et diligentius observetur, manu propria nostra subter eam firmavimus et anuli nostri impressione assignari iussimus.

Signum Hludouuici (MF.) serenissimi regis.

Arnolfus cancellarius ad vicem Liutberti archicappellani recognovi et (SR. NN.) (SI.)

Data XV kal. decembr. anno dominicae incarnationis DCCCLXXX, indictione XIII, anno V regni Hludouuici serenissimi regis; actum Franconofurt; in dei nomine feliciter amen.