Ludwig bestätigt dem Kloster Murbach Zollfreiheit zu Wasser und zu Land in Marsal und Iris.
Datierung: 878 09 13
Ausstellungsort: Modern
(C.) In nomine sanctae et individuae trinitatis. Hludouuicus divina favente gratia rex. Si locis deo dicatis more antecessorum nostrorum quiddam conferimus, id nobis ad aeternam retributionem profuturum manifeste credimus. Quapropter noverit omnium fidelium nostrorum tam praesentium quam et futurorum industria, qualiter quidam venerabilis abba Fridericus ex monasterio quod dicitur Vivarium peregrinorum, quod est situm in ducatu Alsacense super fluvium Muorbah, constructum in honore sancti Leudegarii et sancti Petri principis apostolorum vel sanctae dei genetricis Mariae, detulit nobis auctoritatem, in qua continebatur, qualiter pii antecessores nostri concesserunt eidem monasterio vel monachis ibidem degentibus teloneum de navibus, quae per quaelibet flumina discurrunt, nec non et de carris et sagmariis necessaria ipsius monasterii et congregationis ibidem deo famulantis deferentibus sive in Marsal et in Iris vel ubicumque ierint negotiaverint aut vendiderint. Pro firmitatis itaque ratione postulavit iam dictus abba, ut antecessorum nostrorum morem sequentes huiscemodi auctoritatis beneficium eidem concederemus monasterio. Cuius precibus ob amorem domini nostri annuentes hoc nostrae auctoritatis praeceptum fieri iussimus, per quod iubemus, ut nullus iudex publicus vel quaelibet iudiciaria potestas de navibus et carris sagmariis vel caeteris vehiculis necessaria ipsius monasterii deferentibus de quolibet commertio, undecumque fiscus teloneum exigere potest, ullum teloneum aut quaslibet exactions vel occasiones aut ullum occursum vel ullum censum aut ullam reddibitionem quaerere aut exigere praesumat, ubicumque infra regnum nostrum ad quascumque civitates castella portus pontes treiectus vel caetera loca accessum habuerint, sed licitum sit absque alicuius contrarietate vel detentione naves carra sagmaria et caetera vehicula et homines, qui ea praevidere debent, cum his quae deferent, liber et secure ire et redire; et si aliquas moras causa emendi aut vendendi fecerint nihil ab eis prorsus exigatur. Et ut haec auctoritas nostrae concessionis firmior habeatur et per future tempora a fidelibus nostris melius credatur et diligentius observetur, manu propria nostra subter eam firmavimus et annuli nostri impressione assignari iussimus.
Signum Hludouuici (MF.) serenissimi regis.
Uuolfherius cancellarius advicem Liutberti archicapellani recognovi et (SR. NN.) (SI.)
Data idus septembris anno dominicae incarnationis DCCCLXXVII, indictione XII, anno tertio regni Hludouuici serenissimi regis; actum Matra in colloquio duorum fratrum; in dei nomine feliciter amen.