In nomine domini nostri Iesu Christi dei aeterni. Hludouuicus divina ordinante providentia imperator augustus. Dignum est, ut Christi ecclesias sub nostro imperio constitutas imperialis providentia in pristinum statum revocando auctorem suum sibi conciliet, ne forte in posterum de neglegentia pro sui merito condempnetur. Ideoque universorum sanctae dei ecclesiae nostrorunque fidelium praesentium videlicet ac futurorum industria noverit Gauginum reverendum sanctae Uoloterrensis ecclesiae antestitem nostram suppliciter adiisse praesentiam suaeque ecclesiae varias a nonnullis occupationes invasiones atque deminorationes tam sub occasione libellorum quanque etiam diversis superfluisque violentiis in rebus seu familiis contra dei ac nostram voluntatem illatas lacrimosis querimoniis intimasse, ferentem prae manibus augustalia divae memoriae proavi atque avi patrisque nostri praecepta de integritate atque immunitate et perenni suae ecclesiae tuitione priscis suis praedecessoribus emissa, quae irrumpere nonnulli pervasores pertinaci animo non timuerunt. Quapropter nostrum sibi super hac causa munimentum valde oportunum supplex largiri postulavit, quo istius modi contemptores aut corrigantur aut merito puniantur. Nos igitur divino primum inflexi amore, deinde supra nominati episcopi continua in nostrum obsequium devotione universas iam dictae ecclesiae possessiones a quibuscunque hactenus occupatas, undecunque et quomodocunque a suis rectoribus iuste ac legaliter adquisitas aut in antea deo auspice adquirendas, cum omnibus intrinsecus et extrinsecus casis et familiis diversi sexus et aetatis atque conditionis cartulariis libellariis aldionariciis et cunctis rebus tam mobilibus quanque et immobilibus, cum pertinentiis et adiacentiis omnique integritate sua in nostrum mundburdum et perpetuam imperialis providentiae tutelam recepimus confirmantes eas per hoc nostrae munificentiae imperiale praeceptum praedicto Gaugino venerabili episcopo eiusque in perpetuum successoribus canonico ordine habendas regendas ac perfruendas omnium, qui nostro degunt sub imperio aut futuri sunt, invasione deminoratione atque violentia ab eodem sancto episcopio vel ipsius administratoribus penitus abdicata. Super hec volumus et expresse statuimus, ut universae Andreae quondam praedecessoris sui donationes, prestationes precariorum seu libellorum atque vicaniorum conscriptiones, quas isdem vir incommoditate sui corporis praepeditus emisit, tamquam inutiles habeantur et per omnia irritae sint. Quaecunque autem veterum liberalitate imperatorum ac praedecessorum nostrorum munimentis in saepe dicta ecclesia collocata vel stabilita sunt, rata omnimodis et perenniter mansura decernimus. Ubicunque vero praefato praesuli vel eiusdem ecclesiae oeconomis necessarium visum fuerit, ita de rebus seu familiis episcopii ipsius tamquam de dominicatis nostris per idoneos et credentes homines inquisitionem fieri iubemus. Si quis autem, quod non putamus, ex comitibus ducibus marchionibus gastaldionibus vel aliquibus partis publicae officialibus seu etiam aliquis ex clero vel ex plebeiis aliquam supra taxato sancto ac venerando loco violentiam subtractionem vel invasionem intulerit in rebus mobilibus et immobilibus vel familiis, tamquam imperialis praecepti temerarius violator duodecim pondera auri probatissimi eidem ecclesiae vel ipsius rectoribus componere compellatur; et hoc, quod auferre conatur, evindicare non valeat. Insuper et immunitatis paenam XXX lib. argenti persolvere sancto episcopio cogatur. Similiter volumus, ut quicunque post hanc nostram imperialem praeceptionem libellos, quos pro dei omnipotentis amore nostraeque pariter animae remedio funditus extinximus, retinuerit et ipsos presentaliter saepe dicto reverendo Gaugino episcopo non reddiderit, ut nec ei nec suis successoribus aliqua maneat contrarietatis suspitio, bannum per se et immunitatem per se districtus tamquam rebellio nostrique praecepti transgressor componere cogatur. Et ut hec nostrae sublimitatis concessio munimentum atque immunitas perennem accipiat roborem, manibus propris subter firmavimus et ex anulo nostro nostrisque pariter bullis insigniri praecepimus.
Signum (MF.) domni Hludouuici serenissimi augusti.
Ego Helias diaconus et abbas iussu serenissimi augusti domni Hludouuici scripsi et (SR.) (SI. D.) Acta Coriano; data VI id. decbr, anno Christo propitio piissimi augusti domni Hludouuici XXV, indictione VIII; in dei nomine feliciter. (B. D.)