In nomine domini nostri Iesu Christi dei eterni. Ludouicus divina ordinante providentia imperator augustus. Cunctis sanum sapientibus liquet, quia quo magis cultibus divinis insistimus, eo amplius superne maiestati reconciliamur. Proinde universorum sancte dei ecclesie nostrorumque fidelium presentium scilicet ac futurorum agnoscat unanimitas, quia nos divino afflati instinctu ad honorem et reverentiam tremende ac individue trinitatis sacrosanctum templum in insula, que Casa aurea vocitatur, fundari et consumari hylari mente precepimus; ubi et almificum beatissimi pontificis et martyris Clementis corpus venerabiliter recondi fecimus; atque in eodem situ famulorum dei cenobium perpetuis temporibus permanendum augustaliter atque liberaliter instituimus, quatenus coadunato illic sub regulari norma religiosorum virorum cetu altissimo deo laudes iugiter inibi votaque resultent. Qua de causa ad maiorem nostre mercedis cumulum ac loci ipsius necessarium supplementum Christique servorum in ipso degentium seu illic undecumque adventantium perenne subsidium universas nostre proprietatis res, que sive infra Romanam urbem sive extra ipsam seu etiam per totam Pentapolim Tusciam et Spolitinum ducatum atque Camerinum comitatum nec non etiam Ferminum Ascolinum Aprutinum Penninum seu Teatinum territorium quocumque contractu iuste ac legaliter in nostrum ius dominiumque transfuse sunt, omnes dumtaxat iuris nostri per denominata loca cortes cum servis et ancillis atque aldionibus et omnibus, que in eis invente fuerint, rebus mobilibus et immobilibus, cum universis casis massariciis et aldionariciis ac cuntis appenditiis earum iam dicto summe trinitatis venerabili cenobio presentialiter sollemniterque largimur et per huius nostri precepti imperialem auctoritatem irrefragabiliter stabilimus, ut habeant eas et possideant fruanturque iure quieto ac pacifico ab hodierno die ac deinceps tam hi, qui presentes sunt, quamque et illi, qui venturi sunt, famuli Christi omni nostra proheredumque ac successorum nostrorum repetitione molestatione vel qualibet pupplica exactione remota, ita tamen, ut tres cotidie pro nobis missas et omnibus diurnis ac nocturnis officiis centesimum vigesimum decantare non desinant psalmum, exceptis dumtaxat vespertinalibus et matutinalibus hymnis, quos perpetim pro nostre remedio anime repetere iugiter non cessabunt. Cunctis igitur tam presentibus quam et futuris cognitum sit supra taxatum cenobium habitatoresque ipsius cum universis respicientibus ad ipsum mobilibus et immobilibus rebus sub nostri mundburdi continuam tuitionem a nobis iam dudum esse receptum, in tantum, ut omnem ipsius tanquam peculiarissime domus nostre curam pro amore superno, quoadusque spiramus, exequi modis omnibus decreverimus. Post nostrum vero ex hac vita discessum illi soli eiusdem venerandi loci tutelam committimus, ad cuius honorificentiam nostro studio constat exstructus. Quapropter cunctos, qui nobis in imperium pro tempore successuri sunt, imperatores, duces ac principes, primates quoque locorum supra dictorum ac iudices per ipsam trinam et unam maiestatem districte obtestamur et terribiliter adiuramus, ut prenominatum sacratissimum colende trinitatis municipium iuxta huius nostri precepti tenorem ratum ac stabilitum, ut semel ordinavimus, esse permittant; nullam contra leges violentiam deminorationem vel subtractionem seu invasionem neque etiam quamlibet publicam functionem eidem venerabili loco quocumque in tempore inferre presumant. Et si forte reclamaverint, ad quoscumque eorum querela pervenerit, pro dei summi amore omnem illis iustitiam adimplere non differant. Si quis autem huius nostre institutionis et, quod magis est, divine promulgationis sacrilegus contemptor et temerarius violator extiterit, sciat se in tremendo iusti iudicis examine causam nobiscum dicturum, ac per hoc cum Iuda proditore ab apostolico agmine cum impiis ac sacrilegis sequestratus pars illius sit in stagno ignis ardentis et sulphuris. Sed ut hec nostre liberalitatis ac pie largitionis seu prefixe institutionis pagina perpetuum obtinere valeat roborem, manus eam nostrae annotatione sollemniter insignivimus nostreque bulle inpressione subter confirmari iussimus.
Signum manus domni (M.) Ludouuici serenissimi imperatoris.
Giselbertus presbiter et notarius scripsi et subscripsi.
Data IIIo idus octubris, indictione VIII; actum Olonna curte imperiali, anno imperii domni Ludouuici serenissimi imperatoris XXo Vo deo propitio; feliciter amen.