In nomine domini nostri Iesu Christi dei eterni. Hluodouicus gratia dei imperator augustus. Omnium fidelium sancte dei aecclesie ac nostrorum presentium videlicet ac futurorum comperiet industria, quod Ruthcherus quondam fidelis vassus et ministerialis noster de hac luce discedens quandam curtem sue proprietatis nomine Ruberino in comitatu scilicet Bergamense prope plebem, que dicitur Forum Nouum, ad partem aecclesie Cremonensis obtulisset ac iure proprietario pro anime sue remedio per rogatores suos, Guntheri videlicet, Gyroldum atque Hillonem, per conscriptionis paginam tradidit; et per fideles nostros in nostra presentia eandem traditionis paginam, quam predictus ille vassus noster rogatorque ipsius rei fecerat, undique roborari iussimus. Set pro ampliori firmitate ac tocius securitatis augmento placuit nobis id ipsum nostra ac imperali auctoritate muniri. Et ideo hanc nostre auctoritatis roborationem superaddentes fieri iussimus, per quam omnino sancimus firmumque mansurum constituimus, ut nullus comes neque ullus rei publice minister nec quispiam heredum vel proheredum predicti Ruthcheri atque ulla intercidens et opposita persona quippiam retractationis aut invasionis inquietudinem in his rebus ullo umquam tempore contra prefatam ecclesiam aut rectores eius inferre presumat nec quisquam inde causare conetur. Set sicut in nostra presentia tradite et a nostris fidelibus fuerunt roborate, ita nostris et futuris temporibus nostra hac imperiali auctoritate corroborate ad partem predicte Cremonensis aecclesie iure proprietario maneant inconvulse cum omnibus integritatibus, veluti in brevi testato continetur. Si quis autem contra hanc nostram auctoritatem ire temptaverit ac de prescriptis rebus partem prefate aecclesie inquietare quesierit, penam immunitatis nostre sicut de rebus ceterarum aecclesiarum, hoc est triginta libras argenti, ipsi componet aecclesie. Et ut hoc cercius crederetur ac diligentius observaretur, de anulo nostro subter iussimus sigillari.
Pu [...] notarius advicem Dructemiri recognovi.
Data V idus mar., anno imperii domni Luodouici pii imperatoris in Italia VIII, indictione VIIII; actum Mantua civitate et palatio regio; feliciter in domino amen.