In nomine domini nostri Iesu Christi dei aeterni. Hludouuicus gratia dei imperator augustus invictissimi domni imperatoris Hlotharii filius. Imperiali satis congruit excellentiae, ut fidelium suorum et maxime Christo militantium precibus libenter aures accommodet, quatinus id faciendo et in temporalibus obsequiis eos devotiores undique reddat et apud dominum dignae remunerationis premia percipiat. Igitur cunctorum fidelium sanctae dei ecclesiae nostrorumque praesentium scilicet ac futurorum comperiat sollertia, qualiter Andreas venerabilis Uulterrensis sedis episcopus celsitudinem nostram adiens auctoritatem domni et genitoris nostri Hlotharii praestantissimi imperatoris nostris obtutibus detulit, in qua continebatur, quomodo idem domnus noster et genitor gloriosus Petro eiusdem sedis venerabili quondam praesuli antecessoris istius ob animae suae remedium et ipsius ecclesiae augmentationem iuxta illius petitionem concederet per suam imperialem auctoritatem, in utilitatibus ipsius ecclesiae duo constituisse mercata, in quo negotio et cuncto populo iuvamen adderet et ipsi ecclesiae in augmentis cresceret, in locis scilicet nuncupantibus Sancti Siluestri et Sancti Octauiani. Super quam auctoritatis institutionem petiit serenitatem nostram, ut nostrae imperialis munitionem firmamenti corroborantes perpetualiter adderemus, sicuti et fecimus. His igitur nostro imperiali munimine perenniter confirmatis petiit idem Andreas venerabilis episcopus clementiam nostrae mansuetudinis, ut et nos divinam recensentes vicissitudinem nostra miseratione eiusdem ecclesiae incrementum augeremus et alia duo mercata ibidem imperiali institutione nostra ei constituere in praefatae ecclesiae suae necessitatibus cederemus, unum videlicet in eadem Uulterrense civitate in domo ad festivitatem beatae dei genitricis Mariae, ubi beatus Octauianus corpore requiescit, quod evenit mediante augusto, et alium in curte eiusdem sedis, quae dicitur Camporisae, ad basilicam, quae est constructa in honore beati Petri apostolorum principis, secundum suae deliberationis constitutionem. Cuius preces libenter annuimus et has nostrae serenitatis litteras ei fieri iussimus, per quas statuentes mansurum decrevimus, ut ab hinc in futurum praescripta duo mercata iuxta auctoritatem domni et genitoris nostri ac nostram corroborationis institutionem, alia duo in locis praenominatis iuxta oportuna et praescripta tempora ad partem praefatae Uulterrensis ecclesiae plenissime quieto ac perpetuali permaneant ordine; habeantque licentiam universae nationes usum negotii perfruendi praedictae ecclesiae respicientes quicquid voluerint; et nullus comes nullaque iudiciaria potestas vel quilibet rei publicae administrator ullum teloneum exigere neque super his quicpiam potestatis accipere praesumat; sed maneat pleniter absque alicuius contrarietate ad prefatam ecclesiam sub nostro munimine iuxta nostrae confirmationis institutionem. Ergo si alicuius persona contra hanc nostram auctoritatem insurgere aut eam quodammodo inrumpere temptaverit, sciat se decem libras auri optimi compositurum. Et ut haec nostra auctoritas firmiorem in dei nomine obtineat vigorem, de anulo nostro subter eam iussimus sigillari.
Teodacrus diaconus advicem Dructemiri recognovi et (SR.) (SI.)
Data V kal. iul., anno imperii domni Hlotharii serenissimi augusti XXXII et Hludouuici imperatoris secundo, indictione XIIII; actum Colonna palatio regio; feliciter in domino (NT.: amen).