In nomine omnipotentis dei et salvatoris nostri Iesu Christi. Hlotarius divina
preveniente clementia rex. Expedit regiae celsitudini ita divinis cultibus operam
dare, quatinus aecclesiarum dei iura ac privilegia pristinis temporibus iuste et rationabiliter ordinata sua protectione iuxta domini voluntatem conservet, et si qua caeca cupiditate inordinate ablata perspexerit, quantocius pro Christi nomine reformet, ut et sanctorum intervenientibus meritis aeternae retributionis premium adquirat, eos etiam quibus aecclesiastica iura commissa sunt, sibi devotiores reddat. Quocirca omnium fidelium sanctae dei aecclesiae nostrorumque presentium scilicet ac futurorum noverit utilitas, ....................... ...................... emolumento seu etiam propter devotissimam famulationem Remigii Lugdunensis aecclesie reverentissimi archiepiscopi restituimus per nostrae auctoritatis preceptum aecclesie sancti Stephani Lugdunensis villas Caduliacum videlicet in comitatu Salmoriacensi et Liuiam in pago Uiennensi, quas pridem bonae memoriae Karolus gloriosus rex germanus noster prefatae aecclesiae iusta ratione sua regali auctoritate reformaverat, sed nos postmodum pro quadam necessitate illas in benefitium contuleramus. Quod omnino non recte factum fore cognoscentes, hos nostrae auctoritatis apices fieri censuimus, per quos memoratas villas prefatae casae dei reformamus, quatenus nostris futurisque temporibus absque cuiuslibet subtractione in potestate pontificum eiusdem aecclesiae permaneat, ut deo largiente presules ac clerus eiusdem casae dei pro anima genitoris nostri ac genitricis seu fratris nostri Karoli gloriosi regis nec non et nostra domino attentius preces assiduas fundere studeat. Ut autem haec nostrae restitutionis auctoritas nostris futurisque temporibus inconvulsa permaneat firmitatemque omnem obtineat, manu propria illam roboravimus et anuli nostri impressione insigniri iussimus.