Datierung: 1168 06 13
In nomine domini dei omnipotentis. Cuonradus dei gratia wormaciensis aecclesiae episcopus, universis Christi fidelibus, tam futuris quam presentibus. Omnium quidem dei fidelium, sed maxime pontificalis providentiae est servorum dei necessitatibus consulere, et ut liberius ad pedes domini Jesu sedere, ac divinae contemplationi iugiter inherere valeant, circa ipsorum frequens ministerium satagere. Ea propter noverit universitas cunctorum Christi fidelium ad presens et inposterum, qualiter nos divinae mercedis intuitu, et maiorum aecclesiae nostrae rogatu persuasi, dilectis fratribus nostris in Sconaugia, novellationem agrorum seu pratorum quatuor aratris sufficientem in foraste ad Virnheim pertinente, cuius quidem fundus laureshamense monasterium, regalis vero bannus nostram respicit aecclesiam, hilariter indulsimus, et presentis scripti auctoritate confirmavimus. Preterea | ut inter ipsos et eiusdem aecclesiae parrochianos totius contentionis et querimoniae materiam perpetuo decideremus, ipsius presentis parrochiani consensu, et confratrum nostrorum mediante consilio decrevimus, quatinus triginta casei singuli precio wormaciensis denarii loco decimarum quae ibidem tam de fructibus quam de animalibus quoquo modo elici potuerint, prefato parrochiano suisque successoribus ab eisdem fratribus annuatim persolvantur, et preter hos duo casei similis precii episcopali camerae ob facti memoriam inferantur, atque de reliquo ab omni decimarum seu ceterarum exactionum molestia quieti et immunes permaneant. Et ut huius nostrae concessionis et constitutionis auctoritas per futura tempora conmendabilius prorogetur, atque inviolabiliter conservetur, paginam hanc exinde conscriptam sigilli nostri impressione roborari iussimus, et testes in quorum hec presentia gesta sunt ut infra videtur assignavimus. Cunradus wormaciensis episcopus. Sigehardus laureshamensis abb. Gernodus, Cunradus, capellani. Orto magister de Niwhusen, Trutwinus de Winenheim, Bertholfus de Besinsheim, parrochiani. Rehwinus laureshamensis decanus, Rudolfus prepositus s. Michahelis, Lanzo prepositus s. Petri,
Dauid
, Gerungus, monachi. De nobilibus: Gerhardus, Bertholfus, Godefridus, de Scowenburc, Otto Sporo, Marquardus de Heinvelt. Actum Lobedenburc, idus iunii. Anno dominicae incarnationis MoCoLXoVIIIo. Indictione Ia. Regnante gloriosissimo imperatore Friderico anno XVIo. Pontificatus vero domni Cunradi wormaciensis episcopi anno .. Feliciter in Christo. Amen.
Similem humanitatis affectum et officium famulabus Christi in Gomersheim per hanc concessionem exhibuit.